ԱՄՆ-ն, Դանիան և Գրենլանդիան համաձայնագիր են ստորագրել Գրենլանդիայի անվտանգության հարցերի վերաբերյալ։ ԱՄՆ նախագահ Դոնալդ Թրամփը հայտարարել է, որ կողմերի հարաբերությունները կառուցվելու են անվտանգության հարցերի շուրջ։
Դանիայի վարչապետ Մետտե Ֆրեդերիկսենը նշել է, որ համաձայնագիրը հարգում է Գրենլանդիայի ինքնորոշման իրավունքը և Դանիայի թագավորության տարածքային ամբողջականությունը։ Նրա խոսքով՝ համաձայնագիրը շահավետ է ԱՄՆ-ի, Գրենլանդիայի և Դանիայի համար։
Գրենլանդիայի վարչապետ Յենս-Ֆրեդերիկ Նիլսենը նշել է, որ համաձայնագիրը թարմացնում է 1951 թվականի պաշտպանության մասին պայմանագիրը՝ հաշվի առնելով ներկայիս պայմանները։ Նա նաև հայտարարել է, որ կղզին ընդունում է անվտանգության երկարաժամկետ սպառնալիքները, որոնց մասին խոսել է Թրամփը, և ընդգծել է Արկտիկայում ՆԱՏՕ-ի ուժեղ ներկայության կարևորությունը։
«Այս համաձայնագիրը պետք է այսօր և ապագայում փարատի ցանկացած կասկած այն հարցում, թե ում կողմում է Գրենլանդիայի հավատարմությունը»,- հայտարարել է Նիլսենը։
Ավելի վաղ Թրամփը հայտարարել էր, որ ԱՄՆ-ն սկսում է Գրենլանդիայում լայնածավալ ռազմական ներկայություն ստեղծելու և այնտեղ երկու ռազմաբազա կառուցելու գործընթաց։ Նրա խոսքով՝ Վաշինգտոնը թույլ չի տա իր մրցակիցներին ռազմական ներկայություն հաստատել կղզում։