Հայաստանի Հանրապետության անկախության 35-րդ տարեդարձի կապակցությամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը հանդես է եկել ուղերձով՝ կոչ անելով համայն հայությանը միասնականություն ցուցաբերել արդի մարտահրավերների դիմաց և շարունակել հայրենաշինության առաքելությունը:
Մայր Աթոռ Սուրբ Էջմիածնից հղված Հայրապետական ուղերձում Վեհափառ Հայրապետն իր օրհնությունն է բերել Հայաստանում և Սփյուռքում ապրող հայրենակիցներին՝ ընդգծելով պետականության վերահաստատման անցած բարդ ուղին։
Նա հիշեցրել է, որ անցած երեքուկես տասնամյակների ընթացքում երկիրն անցել է բազմաթիվ փորձությունների միջով, որոնք, սակայն, չեն կոտրել ազգի ոգին: «Մեր ժողովուրդը երբեք չի ընկճվել, չի հուսահատվել, մեծ զոհողությունների գնով անգամ շարունակել է հայրենաշինության սրբազան առաքելությունը և իր ներուժը ծառայեցրել ազգային զարթոնքին», – շեշտել է Կաթողիկոսը։
Անդրադառնալով ներկայիս բարդ աշխարհաքաղաքական պայմաններին՝ Գարեգին Բ-ն նշել է, որ Անկախության տոնը նախևառաջ անցած ուղին վերարժևորելու առիթ է։ Ըստ նրա՝ ներքին և արտաքին սպառնալիքներին դիմագրավելու միակ գրավականը հայրենիքի շուրջ անխախտ համախմբվածությունն է։ Հոգևոր առաջնորդը հորդորել է քաղաքացիներին նախանձախնդրությամբ պաշտպանել հայրենի հողի վրա ազատ ու անվտանգ ապրելու իրավունքը։
«Ամուր պահենք Քրիստոսավանդ հույսը, հավատն ու սերը, հավատարիմ մնանք ազգային-հոգևոր մեր արժեքներին և միասնաբար կերտենք արդար, օրինահարգ, համերաշխ հասարակություն՝ հանուն մեր ապահով ու լուսավոր ապագայի», – ասված է ուղերձում, որը եզրափակվում է Հայաստանին խաղաղություն, իսկ ժողովրդին՝ բարօրություն պարգևելու աղոթքով: