Բելառուսի նախագահ Ալեքսանդր Լուկաշենկոն հայտարարել է, որ Մինսկն ու Երևանը միավորում են ժողովուրդների անկեղծ համակրանքը և հիշեցրել ժամանակի փորձությունը հաղթահարած բարեկամական կապերի արժեքի մասին։
Ինչպես հայտնել է նախագահի մամուլի ծառայությունը, պետության ղեկավարը Բելառուսի ժողովրդի և անձամբ իր անունից շնորհավորել է Հայաստանի ժողովրդին ազգային տոնի՝ Անկախության օրվա առթիվ։
«Մինսկն ու Երևանը միավորում են ոչ միայն պատմության ընդհանուր էջերը, այլև ժողովուրդների անկեղծ համակրանքը, որը բաց և կառուցողական գործընկերության ամուր հիմքն է», — ընդգծել է Լուկաշենկոն իր շնորհավորական ուղերձում, որը հրապարակել է մամուլի ծառայությունը։
Պետության ղեկավարը նշել է, որ այսօր, երբ աշխարհը բախվում է լուրջ մարտահրավերների, հատկապես արժեքավոր են դառնում ժամանակի փորձությունը հաղթահարած բարեկամական կապերը:
Խոսելով տոնի մասին՝ նա ընդգծել է, որ այս նշանակալից իրադարձությունը՝ ինքնիշխանության ձեռքբերման 35-ամյակը, խորհրդանշում է հայ ժողովրդի՝ ազատ և ինքնուրույն զարգացման, ինչպես նաև իր հարուստ մշակույթի պահպանման ձգտումը։
Լուկաշենկոն Հայաստանի ժողովրդին մաղթել է կայունություն և վաղվա օրվա նկատմամբ վստահություն։
«Թող յուրաքանչյուրի տանը տիրեն համերաշխությունն ու ուրախությունը», — հավելել է Բելառուսի առաջնորդը։