Նիդեռլանդների վարչապետ Ռոբ Յետտենը Հաագայի կենտրոնում գտնվող Մալիվելդ հրապարակում տեղի ունեցած զանգվածային անկարգությունների մասնակիցներին մեղադրել է ոստիկանության հետ բախումների ձգտելու և իրավապահների նկատմամբ բռնություն կիրառելու մեջ։
«Այսօր Մալիվելդում անկարգությունների մասնակիցները միտումնավոր փորձում էին առճակատման գնալ ոստիկանության հետ։ Իրավապահների նկատմամբ բռնություն էր կիրառվում, հնչում էին ծայրահեղ աջ և հակասեմական զզվելի կարգախոսներ, ցուցադրվում էին նացիստական ողջույններ»,- X-ում գրել է կառավարության ղեկավարը։
Յետտենը շնորհակալություն է հայտնել ոստիկանությանն ու քաղաքային իշխանություններին՝ անկարգությունների ժամանակ իրականացրած գործողությունների համար։ «Մենք հաստատակամորեն պաշտպանում ենք մեր իրավական պետությունը և թույլ չենք տա չարաշահել ցույցեր անցկացնելու իրավունքը»,- ընդգծել է վարչապետը։
Սեպտեմբերի 19-ին Հաագայի կենտրոնում գտնվող Մալիվելդ հրապարակում մի շարք ծայրահեղ աջ շարժումների հակակառավարական ցույցը վերաճել է զանգվածային անկարգությունների։
Ինչպես տեղից հաղորդել է ТАСС-ը, ցուցարարները ոստիկանների ուղղությամբ շշեր, մետաղյա տարաներ, փայտե ձողեր և պիրոտեխնիկա են նետել, ինչպես նաև պոկել են ճանապարհային նշաններ։
Իրավապահները ներգրավել են հատուկ ստորաբաժանումներ, հեծյալ ոստիկանություն և ծառայողական շներով կինոլոգիական խմբեր։ Հաագայի քաղաքապետարանի որոշմամբ ցույցը դադարեցվել է բռնության բազմաթիվ դեպքերի պատճառով։
Ցույցը ցրելիս ոստիկանությունը ակտիվորեն ուժ է կիրառել, հետապնդել փախչող ցուցարարներին և զանգվածային ձերբակալություններ իրականացրել։