Ադրբեջանի Հանրապետության Ղարաբաղի և Արևելյան Զանգեզուրի շրջաններ դիվանագիտական կորպուսի սեպտեմբերի 11-12-ին կատարած այցի վերաբերյալ Հայաստանում հնչած հակասական հայտարարություններն ու լրատվամիջոցների բացասական արձագանքը հիասթափեցնող են և կարող են բարդացնել Բաքվի և Երևանի միջև խաղաղ գործընթացի առաջխաղացումը: Այդ մասին հայտարարել է ադրբեջանական «Խաղաղության կամուրջ» նախաձեռնող խումբը միաժամանակ, հանդես գալով այցից հետո երկու երկրների միջև երկխոսությունը շարունակելու օգտին, գրում է news.ru–ն։
«Խաղաղության կամուրջ»-ը կարծում է, որ դիվանագետների այցն ադրբեջանական տարածք չպետք է վեճի առարկա դառնա։ Խումբը նաև մտահոգություն է հայտնել այցին մասնակցած դեսպանների և երկրների հասցեին հնչող քննադատության կապակցությամբ նշելով, որ Հայաստանը ճանաչում է Ադրբեջանի ինքնիշխանությունն ու տարածքային ամբողջականությունը։
Ինչպես նշվել է հայտարարության մեջ Բաքուն և Երևանը ներկայումս շարունակում են ջանքերը հաղթահարելու երկարատև հակամարտության հետևանքները։ «Խաղաղության կամուրջ»-ն ընդգծել է հետագա երկխոսության, խաղաղ նախաձեռնությունների և երկրների միջև փոխադարձ վստահության ամրապնդման կարևորությունը։ «Մենք չպետք է թույլ տանք, որ խաղաղ գործընթացը ճնշման ենթարկվի ռևանշիստական ուժերի կողմից, քանի որ դա լրջորեն կվտանգի խաղաղությանն ուղղված հետագա առաջընթացը։ Մենք կոչ ենք անում հայ հասարակությանը պատասխանատու մոտեցում ցուցաբերել այս հարցում և չտրվել չարամիտ մտադրություններ ունեցողների սադրանքներին լինեն դրանք Հայաստանի ներսում, թե արտերկրում»,- ասված է հայտարարության մեջ։
Ավելի վաղ Ադրբեջանի արտաքին գործերի նախարար Ջեյհուն Բայրամովը հայտարարել էր, որ Ադրբեջանը և Հայաստանը սահմանազատել են իրենց պետական սահմանի մոտ 13 կմ հատվածը։ Նրա խոսքով սահմանազատման և սահմանագծման գործընթացը շարունակվում է։ Նախարարը հավելել է, որ այդ նպատակով երկու երկրների կողմից ստեղծվել են հատուկ հանձնաժողովներ, որոնք կգլխավորեն փոխվարչապետները:
Նյութը հրապարակման պատրաստեց Կամո Խաչիկյանը