Բյուրեղավանում ջրի մոնիթորինգն ամենօրյա ռեժիմով իրականացվում է և շատ ուշադիր ենք ընդհանուր ջրի որակի մասով, լրագրողների հետ զրույցում ասաց Առողջապահության նախարար Անահիտ Ավանեսյանը։
Նա նշեց, որ միայն Առողջապահությունը չէ, որ մոնիթորինգ է իրականացնում. «Գիտեք, որ ամեն մի օղակ պատասխանատվության իր շրջանակն ունի, բայց մենք՝ որպես Հիվանդությունների վերահսկման և կանխարգելման կենտրոն, այս ընթացքում ուժեղացրել ենք մոնիթորինգը։ Այս պահին շեղումներ չենք գրանցում։ Գիտեք, ՀՀ ամբողջ տարածքով ակտիվ գնում են ջրային ենթակառուցվածքների բարենորոգման ծրագրերը և այս մասով էլ պատկան մարմինները զբաղվում են»։
Նա ավելացրեց, որ ջրի հետազոտություն էին իրականացրել և իրենք հայտնաբերել էին սնդիկի պարունակության թույլատրելի շեմի շեղումներ. «Դրանից հետո փոխվարչապետ Խաչատրյանի գլխավորությամբ ստեղծվել է աշխատանքային խումբ, ովքեր իրենց լիազորությունների շրջանակներում աշխատանքներ են տանում՝ պարզելու պատճառները»։
Ավանեսյանը տեղեկացրեց, որ համայնքի բնակչությունն ապահովված է անվտանգ ջրամատակարարմամբ, մինչև հանձնաժողովը այս հարցերը կքննարկի և արդյունքների մասին կհայտնի»։