Ուկրաինայի դեմ Ռուսաստանի պատերազմում այլևս հնարավոր չէ երկու կողմերի հաղթանակ. հնարավոր է միայն ռազմական գործողությունների դադարեցում՝ հանուն մարդկային կյանքերի։ Այս մասին հայտարարել է Ուկրաինայի նախագահ Վլադիմիր Զելենսկին՝ CBC News-ին տված հարցազրույցում։ Նա նշել է, որ անհրաժեշտ է փոխել Պուտինի մտածելակերպը։
«Նա ունի աշխարհի ամենամեծ տարածքը, և նրան ինչ-որ կիլոմետրե՞ր են պետք։ Ահա թե ինչու է շատ տարօրինակ, երբ որոշ գործընկերներ ասում են՝ նրան միայն Ուկրաինայի այս հատվածն է պետք, այս կիլոմետրերը, և վերջ»,- ասել է Զելենսկին։ Նրա խոսքով՝ դա «խելահեղ գաղափար է»։ «Պուտինին կիլոմետրեր չեն պետք, նրան անհրաժեշտ է ամբողջ Ուկրաինան՝ որպես Ռուսաստանի մաս»,- նշել է նա։
Զելենսկին նաև անդրադարձել է Ռուսաստանի և Ուկրաինայի համար հակամարտության փոխշահավետ լուծման գաղափարին։ «Մեր մեջ ասած՝ այս պատերազմում «երկուստեք շահեկան» (win-win) արդյունք լինել չի կարող։ Այս պահին միակ իրական հաղթանակը պարզապես պատերազմը դադարեցնելն է՝ հանուն մարդկային կյանքերի, այլ ոչ թե երկու կողմերի համար հավասարապես շահավետ բանաձև փնտրելը»: