Տորոնտոյի միջազգային կինոփառատոնում (TIFF) կայացել է կանադահայ ռեժիսոր Բեն Շիրինյանի լիամետրաժ դեբյուտը՝ «Տնային տնտեսուհին», հայտնել է փառատոնի պաշտոնական էջը։
Հոգեբանական պատմական թրիլերում նկարահանվել են Նաոմի Ուոթսը, Թայ Շերիդանը, Լյուկ Էվանսը, Մայքլ Իմպերիոլին և Լենա Օլինը։ Ֆիլմը պատմում է մի լրագրողի մասին, որը փորձում է գտնել թաքնված նացիստին և հայտնվում է թվացյալ սովորական նյույորքցի տնային տնտեսուհու ուշադիր մշակված աշխարհում։
Բեն Շիրինյանը հայ ռեժիսոր է, որի տատիկն ու պապիկը վերապրել են Հայոց ցեղասպանությունը։ Նա ծնվել և մեծացել է Մոնրեալում, իսկ այժմ ապրում և աշխատում է Տորոնտոյում։
Շիրինյանը հայտնի է իր կարճամետրաժ ֆիլմերով և պարային աշխատանքներով, այդ թվում՝ «Կորած շարժման մեջ» ֆիլմով, որը համագործակցություն է Կանադայի ազգային բալետի պարող և պարուսույց Գիլյոմ Կոտեի հետ։
