Ռուսաստանն ու Ուկրաինան գիշերը հարվածներ են փոխանակել: Կիևի քաղաքային ռազմական վարչությունը հայտնել է Ուկրաինայի մայրաքաղաքի Դարնիցկիի շրջանում գտնվող բենզալցակայանի վրա ռուսական անօդաչու թռչող սարքերի (ԱԹՍ) հարձակման հետևանքով մեկ մարդ վիրավորվել է: Կիևի քաղաքապետ Վիտալի Կլիչկոն հայտնել է, որ տուժածի վիճակը ծանր է:
Ուկրաինական զինուժն իր հերթին հարվածներ է հասցրել Ռուսաստանի տարբեր շրջանների: Սամարայի մարզի նահանգապետ Վյաչեսլավ Ֆեդորիշչևը հայտնել է, որ գիշերված հարձակման հետևանքով «վնասվել է արդյունաբերական օբյեկտներից մեկը»։ Նա չի նշել, թե որ օբյեկտի մասին է խոսքը։ Ուկրաինական լրատվամիջոցները և տեղական առցանց խմբերը հայտնում են, որ հարձակման է ենթարկվել Սիզրանի նավթավերամշակման գործարանը: Զոհեր չկան:
Ռոստովի նահանգապետ Յուրի Սլյուսարը հայտնել է, որ զանգվածային հրթիռային հարձակման է ենթարկվել Տագանրոգը: Նրա փոխանցմամբ՝ վնասվել են առցանց առևտրի հարթակ Ozon-ի պահեստ, երկու բնակելի շենքերի պատուհաններ, երեք մասնավոր տուն, ուսհաստատություն, առևտրային շենք և այլ շինություններ։ Ուկրաինան դեռևս չի մեկնաբանել հարձակումը։
Լեհաստանի զինված ուժերի օպերատիվ հրամանատարությունը հայտնել է, որ երկրի օդային տարածքում սկսվել են ռազմական ավիացիայի գործողություններ։ Հրամանատարությունը պարզաբանել է, որ դա պայմանավորված է ռուսական ռեակտիվ անօդաչուների ակտիվությամբ, որոնք հարձակվում են Ուկրաինայի տարածքի վրա։