Մերձավոր Արևելքում մարտերը պետք է դադարեցվեն, և երկրները պարտավոր են պահպանել միջազգային իրավունքը՝ պաշտպանելով քաղաքացիական անձանց, հայտարարել է ՄԱԿ-ի Մարդու իրավունքների խորհուրդը։
ՄԱԿ-ի Մարդու իրավունքների խորհրդի Իրանի հարցով անկախ փաստահավաք առաքելությունը նշել է, որ չնայած ԱՄՆ-ի պնդումներին, որ իր զինված ուժերը չեն թիրախավորում քաղաքացիական անձանց Իրանում, քաղաքացիական անձանց շրջանում զոհերի թիվը շարունակում է աճել։
«Առաքելությունը վերահաստատում է իր կոչը ՄԱԿ-ի անդամ պետություններին՝ անհապաղ դիվանագիտական քայլեր ձեռնարկելու ռազմական հակամարտությունը դադարեցնելու, լարվածությունը թուլացնելու և խաղաղության, մարդու իրավունքների, արդարադատության և քաղաքական ու հասարակական կյանքում հավասար մասնակցության վերաբերյալ կառուցողական երկխոսությունը վերսկսելու համար», – հայտարարել է առաքելությունը։
Առաքելությունը հղում է կատարել սեպտեմբերի 1-ին ԱՄՆ-ի կողմից իրականացված ավիահարվածին, որի հետևանքով ավերվել էր Հորմոզգան նահանգում գտնվող մի տուն, որտեղ հարսանիք էր տեղի ունենում։ Իրանական լրատվամիջոցները հայտնել էին հինգ մարդու, այդ թվում՝ երկու երեխայի և մեկ կնոջ մահվան և տասնյակների վիրավորման մասին։ Հուլիսի 30-ին ևս մեկ ավիահարված ավերել էր բնակելի շենք, ինչի հետևանքով, ըստ հաղորդագրությունների, զոհվել է մեկ տղամարդ, մեկ կին և նրանց երկու տարեկան որդին, ինչպես նաև վիրավորվել են նրանց երկու մյուս երեխաները, հայտարարել է առաքելությունը։
Ինչպես նշել է առաքելության անդամ Մաքս դյու Պլեսիսը, քաղաքացիական բնակչության շրջանում զոհերի հանգեցրած ավիահարվածները լուրջ հարցեր են առաջացնում այն մասին, թե արդյոք պետությունները ձեռնարկում են բոլոր անհրաժեշտ միջոցները միջազգային իրավունքի համաձայն իրենց պարտավորությունները կատարելու համար, այդ թվում՝ ձեռնարկու՞մ են արդյոք բոլոր նախազգուշական միջոցները՝ քաղաքացիական բնակչության շրջանում մահերը կանխելու համար։
«Առաքելությունը կոչ է անում տարածաշրջանային հակամարտության բոլոր կողմերին խստորեն պահպանել միջազգային իրավունքը և դադարեցնել ռազմական գործողությունները», – ասվում է հայտարարության մեջ։