Iravaban.net-ը ուսումնասիրել է «Հայաստանի Հանրապետության քաղաքացիության մասին» օրենքում փոփոխություններ կատարելու մասին» և «Պետական տուրքի մասին» օրենքում փոփոխություններ կատարելու մասին» օրենքների նախագիծը։ Կվերանայվի ՀՀ քաղաքացիությունը դադարեցրած անձանց կողմից քաղաքացիության վերականգնման կարգը:
Ի՞նչ է առաջարկում նախագիծը
Հայաստանի Հանրապետության քաղաքացիությունից հրաժարված անձը քաղաքացիությունը վերականգնելու համար այլևս չի կարողանա անմիջապես դիմել։ Նոր նախագծով առաջարկվում է քաղաքացիությունից հրաժարվելու և դրա վերականգնման միջև սահմանել առնվազն 5 տարվա ժամանակային շեմ։
Ինչո՞ւ է առաջարկվում փոփոխությունը
Գործող կարգավորումների համաձայն՝ ՀՀ քաղաքացիությունը դադարեցրած անձը կարող է այն հետագայում վերականգնել՝ առանց նվազագույն սպասման ժամկետի։ Նախագծի հեղինակների ուսումնասիրության համաձայն՝ գործնականում եղել են դեպքեր, երբ անձը հրաժարվել է ՀՀ քաղաքացիությունից, իսկ կարճ ժամանակ անց սկսել է դրա վերականգնման գործընթացը։
Նախագծի հիմնավորման համաձայն՝ նման վարքագիծը կարող է պայմանավորված լինել տարբեր նպատակներով, այդ թվում՝ քաղաքացիությունից բխող որոշակի պարտավորություններից խուսափելու կամ դրանք հետաձգելու, իսկ հետագայում՝ քաղաքացիության հետ կապված իրավունքներից և արտոնություններից կրկին օգտվելու ցանկությամբ։
Ի՞նչ խնդիր է փորձում լուծել պետությունը
Նախագծի հեղինակները նշում են, որ քաղաքացիությունը միայն ձևական իրավական կարգավիճակ չէ, այլ պետության և անձի միջև երկարաժամկետ իրավաքաղաքական կապ։
Հետևաբար, քաղաքացիությունից հրաժարվելն ու կարճ ժամանակ անց այն վերականգնելը, ըստ հիմնավորման, չպետք է վերածվի իրավիճակային կամ գործիքային մեխանիզմի։
Ի՞նչ է առաջարկվում
Առաջարկվում է քաղաքացիությունից հրաժարվելու և հետագայում այն վերականգնելու միջև սահմանել նվազագույն 5 տարվա ժամկետ։
Այսինքն՝ ՀՀ քաղաքացիությունը դադարեցնելուց հետո անձը չի կարողանա անմիջապես վերականգնել այն․ անհրաժեշտ կլինի սպասել ՀՀ նախագահի համապատասխան հրամանագրի ուժի մեջ մտնելուց հետո սահմանված 5 տարվա ժամկետի լրանալուն։
Ի՞նչ փորձ է ներկայացվում
Նախագծի հիմնավորման մեջ նշվում է, որ քաղաքացիության վերականգնման տարբեր սահմանափակումներ կիրառվում են նաև մի շարք այլ երկրներում, այդ թվում՝ Գերմանիայում, Ֆրանսիայում, Միացյալ Թագավորությունում և սկանդինավյան երկրներում։
Հիմնական մոտեցումն այն է, որ քաղաքացիությունից հրաժարումն ու դրա հետագա վերականգնումը չպետք է դիտարկվեն որպես ինքնաբերաբար իրար հաջորդող գործընթացներ։
Ո՞րն է փոփոխության նպատակը
Նախագծի հեղինակների գնահատմամբ՝ 5 տարվա սահմանափակումը պետք է նպաստի քաղաքացիության ինստիտուտի կայունությանը, կանխի դրա իրավիճակային օգտագործումը և ամրապնդի քաղաքացիությունը՝ որպես պետության ու անձի միջև երկարաժամկետ կապի ընկալումը։