ԱՄՆ նախագահի հատուկ բանագնաց Սթիվ Ուիթքոֆն ու ամերիկյան առաջնորդի փեսա Ջարեդ Քուշները Կիև են բերել խաղաղության համաձայնագրի ավելի վատ պայմաններ, քան նախկինում առաջարկվում էր Ուկրաինային։ Այս մասին հայտարարել է Ուկրաինայի Գերագույն ռադայի պատգամավոր Աննա Սկորոխոդը, հայտնում է ՏԱՍՍ-ը։
«Սա ոչ միայն առաջընթաց չէր, այլև նրանք եկել են ավելի վատ պայմաններով, քան նախկինում ունեինք։ Եթե նախկինում չէր պահանջվում փոփոխություններ կատարել Սահմանադրության մեջ և ճանաչել տարածքները, ապա այժմ դա պահանջվում է։ Կան նաև մի շարք այլ նրբություններ, որոնց մասին չեմ ցանկանում բարձրաձայնել, քանի որ այդ տեղեկությունը ստացել եմ ոչ պաշտոնական աղբյուրներից»,- ուկրաինացի լրագրող Վիտալի Դիկիին տված հարցազրույցում ասել է նա։