Ադրբեջանի մարդու իրավունքների հանձնակատար Սաբինա Ալիևան «անհիմն» և «կողմնակալ» է որակել սեպտեմբերի 4-ին Հայաստանում կայացած մամուլի ասուլիսի ժամանակ հնչած հայտարարությունները՝ կապված Բաքվի բանտում ապօրինի պահվող հայ գերիների հետ:
Իրավապաշտպան Սիրանուշ Սահակյանը հայտարարել էր, թե որ Ադրբեջանում ապօրինի պահվող գերիներն ու բանտարկյալները կրոնական հիմքով ենթարկվում են խտրականության և խոշտանգումների, ոչնչացվում են քրիստոնեական կրոնական խորհրդանիշները, արգելվում է Աստվածաշնչի օգտագործումը, իսկ կալանավորներին ստիպում են կարդալ Ղուրան։
Օմբուդսմենը այդ հայտարարությունները որակել է որպես ընթացող խաղաղ բանակցությունները խաթարելու փորձ։
Նրա խոսքով՝ առանց որևէ հավաստի ապացույցի նման լուրջ մեղադրանքներ ներկայացնելը հակասում է մարդու իրավունքների պաշտպանության սկզբունքներին։
«Մասնավորապես, առանձին անձանց հետ կապված հարցերը նրանց կրոնական պատկանելության հետ կապելու և դրանք քրիստոնեա-մահմեդական հակամարտության հարթություն տեղափոխելու փորձերը բացարձակապես անընդունելի են»,- նշել է Ալիևան: