ՄԱԿ-ի Գլխավոր ասամբլեան ընդունել է բանաձև, որով կոչ է արվում միջազգային կազմակերպություններին և պետություններին օգտագործել աշխարհի այնպիսի քարտեզներ, որոնք ավելի ճշգրիտ են արտացոլում մայրցամաքների իրական չափերը։
Ուրբաթ օրը բանաձևին կողմ է քվեարկել 164 պետություն։ Միացյալ Նահանգները դեմ է արտահայտվել, ևս վեց երկիր ձեռնպահ է մնացել։
Տոգոյի և Աֆրիկյան միության ներկայացրած բանաձևը խրախուսում է «Հավասար Երկիր» քարտեզային պրոյեկցիայի կիրառումը։ Այն ստեղծվել է 2018 թվականին և նախատեսված է մայրցամաքների ու երկրների մակերեսների հարաբերակցությունն ավելի ճշգրիտ ներկայացնելու համար։
Նոր մոտեցումը դիտարկվում է որպես այլընտրանք Մերկատորի պրոյեկցիային, որը մշակել է ֆլամանդացի քարտեզագիր Գերարդուս Մերկատորը 16-րդ դարում։ Մերկատորի պրոյեկցիան նախատեսված էր հիմնականում ծովային նավարկության համար, սակայն այն զգալիորեն մեծացնում է բարձր լայնություններում գտնվող տարածքների տեսանելի չափերը։
«Քարտեզները ձևավորում են աշխարհի մասին մեր պատկերացումները, սակայն դրանք երբեք չեզոք չեն»,- ՄԱԿ-ի Գլխավոր ասամբլեայում հայտարարել է Տոգոյի արտաքին գործերի նախարար Ռոբերտ Դուսեթը։ Նրա խոսքով՝ աղավաղված քարտեզները կարող են ամրապնդել աշխարհի աշխարհագրության վերաբերյալ սերնդեսերունդ փոխանցվող սխալ պատկերացումները։
«Հավասար Երկիր» պրոյեկցիայի դեպքում Աֆրիկան, Լատինական Ամերիկան, Հարավային Ասիան և Օվկիանիան ավանդական Մերկատորի քարտեզի համեմատ ավելի մեծ են պատկերվում՝ ավելի մոտ լինելով դրանց իրական մակերեսային հարաբերակցությանը։