Ինչո՞ւ Հայաստանի զինված ուժերի մարտական դրոշների գույնը կարմիրից փոխվեց կապույտի։ Պաշտոնական՝ 1995 թվականի նկարագրությամբ ՀՀ ԶՈւ զինվորական մասի մարտական դրոշի պաստառը բալերանգ կարմիր էր։ 2026 թվականի մայիսի 28-ի զորահանդեսից հետո արդեն հրապարակումներ եղան նոր՝ կապույտ գույնի մարտական դրոշի մասին։
«Կարծում եմ այս հարցը հետաքրքրում է ոչ միայն ինձ, այլ նաև հատկապես նախկին ու գործող սպաներին, և ընդհանրապես բոլոր նրանց, ում համար կարևոր է մեր բանակի ճակատագիրը»,- ասում է տարածաշրջանային վերլուծաբան Ալեն Ղուլյանը։
Մարտական դրոշների կարմիր գույնը ավանդաբար խորհրդանշում է մարտերում թափված արյունը, նախորդ սերունդների պաշտպանների զոհողությունների ու սխրանքների հիշատակը։
«Պատմության գիտակներին հարց․ կա՞ արդյոք այս որոշման որևէ պատմական բացատրություն։ Միգուցե Տիգրան Մեծի, Ավարայրի կամ Սարդարապատի ժամանակ հայկական բանակն ունեցել է հենց այսպիսի դրոշներ։ Գուցե կապույտ գույնը կապված է մեր ինչ-որ մեծ հաղթանակների հետ, որոնց մասին մենք պարզապես մոռացե՞լ ենք։ Նոր մարտական դրոշների երանգն էլ ինչ-որ առումով հիշեցնում է Նիկոլ Փաշինյանի «Քաղաքացիական պայմանագիր» կուսակցության խորհրդանիշների գույնի և «խաղաղություն» կարգախոսով նրա վերջին նախընտրական արշավի գույնի միջև եղած մի բան»,- նկատում է վերլուծաբանը։
Ի դեպ, անցած տարվա սեպտեմբերին և դեկտեմբերին հրապարակումներում ԶՈւ ԳՇ պետ Էդվարդ Ասրյանը զինվորական ստորաբաժանումներին հանձնում էր կարմիր գույնի մարտական դրոշներ։
«Կարելի՞ է ենթադրել, որ սա նույնպես որոշակի ուղերձ է հակառակորդին այն մասին, որ մենք այլևս երբեք չենք պատերազմելու մեր տարածքների համար, և մեր բանակն այժմ «խաղաղության բանակ» է։ Լավ է՝ գոնե կապույտի վրա կանգ առան։ Սպիտակը՝ որպես մարտական դրոշի գույն, արդեն չափազանց բացահայտ ուղերձ կլիներ…»,- ասում է Ղուլյանը։