Ինչպես տեղեկացնում է Iravaban.net–ը՝ ՀՀ ընտանեկան օրենսգրքի 12-րդ հոդվածը նախատեսում է, որ ամուսնացող անձինք կարող են մինչև ամուսնությունը անցնել բժշկական հետազոտություն, ինչպես նաև ստանալ բժշկագենետիկական և ընտանիքի պլանավորման վերաբերյալ խորհրդատվություն։
Հետազոտությունն իրականացվում է առողջապահական կազմակերպություններում՝ պետության կողմից երաշխավորված ամենամյա առողջապահական նպատակային ծրագրերի շրջանակներում։
Կարևոր է՝ բժշկական հետազոտությունը ամուսնացող անձանց համար պարտադիր չէ․ այն իրականացվում է նրանց ցանկությամբ։
Հետազոտության արդյունքները բժշկական գաղտնիք են
Ամուսնացող անձի բժշկական հետազոտության արդյունքները համարվում են բժշկական գաղտնիք։
Դրանք կարող են հաղորդվել այն անձին, որի հետ քաղաքացին մտադիր է ամուսնանալ, միայն հետազոտություն անցած անձի համաձայնությամբ։
Այսինքն՝ առողջական վիճակի վերաբերյալ տեղեկատվությունը չի կարող ինքնաբերաբար փոխանցվել ապագա ամուսնուն կամ այլ անձանց։
Ի՞նչ է նախատեսվում, եթե առողջական խնդիրները թաքցվել են
Օրենքը նաև նախատեսում է իրավական հետևանք այն դեպքի համար, երբ ամուսնացած անձը պետական գրանցման պահին մյուս ամուսնուց թաքցրել է իր մոտ՝
- սեռավարակի, այդ թվում՝ ՄԻԱՎ-ի,
- հոգեկան հիվանդության,
- թմրամոլության,
- թունամոլության
առկայության փաստը։
Այս դեպքում մյուս ամուսինն իրավունք ունի դիմել դատարան՝ ամուսնությունն անվավեր ճանաչելու պահանջով։
Այսպիսով, օրենքը մի կողմից ապահովում է ամուսնացող անձի բժշկական տվյալների գաղտնիությունը, իսկ մյուս կողմից նախատեսում է դատական պաշտպանության հնարավորություն, եթե ամուսնության պետական գրանցման պահին կարևոր առողջական հանգամանքները դիտավորյալ թաքցվել են մյուս ամուսնուց։