Բաքվում հայ գերիների «15 ի գործով» դատավճիռը հրապարակելու ցանկություն կա, բայց չկա հնարավորություն, այսօր հայտարարել է ՄԻԵԴ-ում գերիների շահերի պաշտպան Սիրանուշ Սահակյանը:
«15-ի գործով» մեզ հասանելի է բացառապես քաղվածքը, որը պարունակում է դատապարտված հոդվածների վերաբերյալ տեղեկատվություն և պատժի վերաբերյալ, այն ամբողջական տեքստ չէ։ Այս պահին ես` որպես նրանց փաստաբան, Եվրոպական դատարանում իրավական ներկայացուցիչ, զրկված եմ այդ դատական ակտին ծանոթանալու, հիմքերը ուսումնասիրելու հնարավորությունից և համանման վիճակում են գտնվում նաև ընտանիքի անդամները և ինչու ոչ՝ Ադրբեջանի հանրային պաշտպանները»,- ասել է նա։
Ռուբեն Վարդանյանի պաշտոնական մեղադրական եզրակացությունն ու դատավճիռը, որը հրապարակվել է փետրվարի 17-ին, այժմ հասանելի է։ Նրա ընտանիքը, ըստ փաստաբանի, այն կարողացել է ձեռք բերել հուլիս ամսին։
Դատավճիռի ուսումնասիրությունը ցույց է տվել, որ «ողջ դատավարությունը եղել է ֆարս, դրա արդյունքը լեգիտիմ չէ, և իհարկե, մենք մեր իրավական փաստարկները ներկայացրել ենք Մարդու իրավունքների եվրոպական դատարան»,- ասել է Սիրանուշ Սահակյանը։
Ըստ նրա՝ Ռուբեն Վարդանյանի դատավճիռը էտալոնային է, քանի որ խախտված են իրավական ու բարոյական նորմերը, նաև մարդկային ողջամտության և բանականության սահմանները։