Ռուսական զինուժն անօդաչուներով առավոտյան հարվածել է Օդեսա քաղաքին, ինչի հետևանքով սպանվել է մեկ, վիրավորվել հինգ մարդ, հայտնել է Օդեսայի տարածաշրջանային ռազմական վարչակազմի ղեկավարը:
Օլեգ Կիպերը նաև հայտնել է, որ վնասվել են երկու մասնավոր տուն, մեկ ոչ բնակելի շենք և մեկ մեքենա։
Օդեսայի քաղաքապետ Սերգեյ Լիսակն իր հերթին լուսանկարներ է հրապարակել սոցցանցում:
Ռուսական անօդաչու թռչող սարքերը գիշերը հարձակվել են ուկրաինական Զապորոժիեի վրա, հայտնել է Պետական արտակարգ իրավիճակների ծառայության տարածաշրջանային գրասենյակը։ Հարձակման հետևանքով հրդեհ է բռնկվել բազմահարկ բնակելի շենքում: Այրվել է երկու բնակարան, մեկ կին վիրավորվել է։
Կիևի Դարնիցկի շրջանում անօդաչու թռչող սարքի կործանման հետևանքով երկու մարդ վիրավորվել է, հայտնում է քաղաքի ռազմական վարչությունը։
Ուկրաինական զինուժն իր հերթին հարվածել է Սոչիի և Սիրիուսի դաշնային տարածքին, ինչի հետևանքով նավթի պահեստում հրդեհ է բռնկվել:
Կրասնոդարի երկրամասի օպերատիվ շտաբի փոխանցմամբ՝ մի քանի բնակելի շենքերի պատուհաններ են վնասվել, իսկ որոշ դեպքերում հրդեհներ են բռնկվել, բայց դրանք արագ մարվել են։