Անցեալ եղանակի սկիզբը անգլիական ֆութպոլի ակումբները մրցանիշ հաստատած էին 4,25 միլիառ ամ. տոլար ծախսելով ֆութպոլիստներու վրայ, բայց այս տարի անոնք աւելի ծախսեցին` այդ թիւը բարձրացնելով 4,7 միլիառի:
Մանչեսթըր Սիթի իր մեծագոյն փոխանցումը վերջին օրուան ձգեց, ուր արժանթինցի Էնզօ Ֆեռնանտես դարձաւ պատմութեան ամէնէն «սուղ» խաղցողներէն մէկը` լքելէ ետք Չելսին եւ միանալով Սիթիին` 169 միլիոն ամ. տոլարի փոխարէն:
Սիթիի այս ամրան ձախսած գումարները հասան 600 միլիոն ամ. տոլարի, որ մրցանիշ մըն է ֆութպոլի մէկ ակումբի համար, Կուարտիոլայի լքելէն ետք:
Չելսի եւ Թոթենհամ իրենց կարգին 400 միլիոն ամ. տոլարէն աւելի ծախսեցին` փաստելով, որ նիւթական գետնի վրայ «Փրեմիեր լիկ»-ը այլ մակարդակ ունի: Ասոր պատճառն ալ այն է, որ անգլիական խումբեր հսկայական գումարներ կը ստանան թէ՛ «Փրեմիեր լիկ»-ի ուղիղ սփռումներէն, թէ՛ ալ «Չեմփիընզ լիկ»-ի սփռումներէն, որոնք ինքնաբերաբար առաւելութիւն են ակումբներուն համար:
Ամառնային փոխանցումներու պատուհանը փակուեցաւ, եւ Սպանիոյ, Իտալիոյ, Գերմանիոյ եւ Ֆրանսայի ակումբները իրենց ծախսերուն առումով միասնաբար 3,8 միլիառ ամ. տոլարի կրցան հասնիլ, որ շատ աւելի նուազ է «Փրեմիեր լիկ»-ի 20 ակումբներու ծախսերէն:
Ինչպէս նշեցինք, Կուարտիոլայի հեռանալէն ետք նշանակուեցաւ իտալացի Էնցօ Մարեսքան, որ 440 միլիոն ամ. տոլար «ծախսեց» վերակազմելու միջնապահ գիծ մը` ձեռք ձգելով Էլիոթ Անտերսոնը (155 միլիոն) եւ Մարոքի Այյուպ Պուատտին (117 միլիոն)` Ֆեռնանտեսի կողքին: Սիթի ձեռք ձգեց նաեւ սենեկալցի ծայրի յառաջապահ Իլիման Էնտայը` Էվըրթընէն (81 միլիոն ամ. տոլար):
Ապու Տապիի կողմէ ղեկավարուած Սիթին մօտ 400 միլիոն շահեցաւ այս ամառ` «ծախելով» քանի մը խաղցողներ: Լքողներու կարգին էին Սպանիոյ ազգային խմբապետ Ռոտրի (դէպի Պարսելոնա), Պեռնարտօ Սիլվա (դէպի Ռէալ Մատրիտ) եւ Ճեք Կրիլիշ (դէպի Էվըրթըն):
Ֆեռնանտեսի փոխանցման մրցանիշը հաւասարեցաւ անցեալ տարուան Լիվըրփուլի վճարած գումարին` ձեռք ձգելու Ալեքսանտր Իզաքը (Նիւքեսըլէն):
Թոթենհամի ամրան «գնումները» բաւական Սիթիի նման էին, եւ Լոնտոնի ակումբը բաւական աշխուժ էր մինչեւ երեքշաբթի գիշեր (փոխանցումի պատուհանի փակումը)` ձեռք ձգելով Չելսիի 2 մարզիկներ: Ուքրանացի ծայրի յառաջապահ Միխայլէ Մուտրիք եւ Թոսին Ատարապիոյօ միացան Թոթենհամին:
Չելսի փորձեց Ֆեռնանտեսը անմիջապէս փոխարինել Մոնաքոյի սենեկալցի միջնապահ Լամին Քամարայով, բայց ֆրանսական ակումբը վերջին վայրկեանին մերժեց փոխանցումը:
Լիվըրփուլ ձեռք ձգեց 18 տարեկան բերդապահ Լուքա Պրուկմանսը` Պելճիքայի Կենք խումբէն (35 միլիոն):
Նիւքեսըլ ձեռք ձգեց այլ պելճիքացի մը` յառաջապահ Մաթիաս Ֆեռնանտես-Փարտոն ֆրանսական Լիլէն (59 միլիոն), նոյն պահուն փոխ տալով գերմանացի յառաջապահ Նիք Վոլթեմատէն` Իտալիոյ Եուվենթուսին:
Ասթոն Վիլա ակումբին համար մեծ փոփոխութիւններ տեղի ունեցան, երբ աստղեր, ինչպէս` Օլի Ուաթքինզ, Մորկըն Ռոճըրզ, Էզրի Քոնսա եւ Էմիլիանօ Մարթինես լքեցին խումբը: Ասթոն Վիլա ձեռք ձգեց Փարիզ Սեն Ժերմենի մարզիկ Իպրահիմ Էմպայէն, եւ կան մարզիկներ, որոնց փաստաթուղթերը տակաւին չեն ամբողջացած:
Իտալիոյ «Սերի Ա.»-ն Անգլիոյ «Փրեմիեր լիկ»-էն ետք ամէնէն շատ ծախսող երկիրն է, եւ այդ ծախսերուն ընդհանուր գումարը հասաւ 1,34 միլիառի:
Վոլթեմատէի կողքին, Եուվենթուս ձեռք ձգեց Թոթենհամի միջնապահ Փափէ Մաթար Սարրը:
Պեթօ Ֆիորենթինային միացաւ լքելէ ետք Էվըրթընը` փոխարինելու համար Մոյսէ Քինը, որ միացաւ Սեսք Ֆապրեկասի մարզած Քոմօ ակումբին:
Պրազիլի նախկին աստղ Ռոպինիոյի զաւակը` 18 տարեկան Ռոպինիօ Ճունիոր միացաւ Ճենովային, իսկ անգլիացի յառաջապահ Ճոնաթըն Ռոու Պոլոնիայէն փոխանցուեցաւ Աթալանթայի:
Սպանիոյ մէջ, Ռէալ Մատրիտ բաւական լուռ մնաց վերջին օրուան իրարանցումէն, մանաւանդ որ կանուխէն ձեռք ձգած էր Եան Տիոմանտէն, Տենզել Տումֆրիզը եւ Մարք Քուքուրելիան: Մրցակից Պարսելոնա բաւական աչքառու փոխանցում մը կատարեց` ձեռք ձգելով Արսենալի պրազիլցի յառաջապահ Կապրիէլ Ժեզուզը: Արսենալէն նախապէս հեռացած էին Լեանտրօ Թրոսար (Պեշիքթաշ), Իթըն Նուաների (Տորթմունտ) եւ Կապրիէլ Մարթինելլի, որ շատ հաւանաբար կրնայ մեկնիլ Սէուտական Արաբիա:
Քանատացի յառաջապահ Ճոնաթան Տէյվիտ Եուվենթուսը լքեց եւ միացաւ Աթլեթիքօ Մատրիտին:
Գերմանիոյ մէջ, վերջին օրը Պայեր Լեւերքուզըն ձեռք ձգեց Տեզիրէ Տուէի աւագ եղբայրը` Կելա Տուէն, ինչպէս նաեւ իր խումբին վերադարձուց Մուսա Տիապին 3 տարի ետք:
Սպանացի երիտասարդ Մարք Կույու լքեց Չելսին եւ միացաւ Ռետ Պուլ Լայփցիկին (19,7 միլիոն ամ. տոլար):
Ֆրանսայի մէջ, Մորից Քիակոր լքեց Ռետ Պուլ Զալցպուպկը եւ միացաւ Լիլին` փոխարինելով Պուատտին: