ՄԱԿ-ի գլխավոր քարտուղար Անտոնիո Գուտերեշը մտահոգված է Իրանի վրա ԱՄՆ-ի հարվածների ժամանակ զոհերի մասին հաղորդագրություններից և դատապարտում է քաղաքացիական անձանց վրա բոլոր հարձակումները, հայտարարել է նրա խոսնակ Ստեֆան Դյուժարիկը։
Ավելի վաղ Իրանի հարավային Հորմոզգան նահանգի փոխնահանգապետ Ահմադ Նաֆիսին հայտնել էր, որ նահանգում հարսանեկան արարողության ժամանակ ԱՄՆ-ի կողմից իրականացված հարձակման հետևանքով տուժածների թիվը հասել է 68-ի: Իրանի իշխանությունները հետագայում հայտնել են չորս զոհի մասին, մինչդեռ մի քանի լրատվամիջոցներ, հղում անելով Իրանի Կարմիր մահիկին, հայտնել են հինգ զոհի մասին:
«Գլխավոր քարտուղարը խորապես անհանգստացած է քաղաքացիական բնակչության շրջանում զոհերի մասին հաղորդագրություններից, այդ թվում՝ Իրանում հարսանեկան արարողության ժամանակ տեղի ունեցած հարձակման կապակցությամբ։ Գլխավոր քարտուղարը դատապարտում է քաղաքացիական բնակչության վրա բոլոր հարձակումները», – լրագրողների հետ ճեպազրույցի ժամանակ ասել է Դյուժարիկը։