Իրանը հրթիռներով և անօդաչու թռչող սարքերով հարվածներ է հասցրել Հորդանանում, Քուվեյթում, Իրաքում և Բահրեյնում ամերիկյան ռազմաբազաներին՝ Իրանի տարածքին ԱՄՆ-ի նոր հարվածներից հետո։
Իրանի Կարմիր մահիկի հաղորդմամբ՝ ԱՄՆ հրթիռային հարվածի բեկորները Սիրիկ քաղաքում հարվածել են մի տան, որտեղ հարսանեկան խնջույք էր ընթանում։ Զոհվել է հինգ մարդ, այդ թվում՝ մեկ երեխա, ավելի քան 50 մարդ վիրավորվել է։
ԱՄՆ զինված ուժերը հայտարարել են, որ տեղյակ են Սիրիկի միջադեպի մասին և նշել, որ քաղաքացիական անձանց չեն թիրախավորում։
Իսլամական հեղափոխության պահապանների կորպուսը հայտարարել է, որ ի պատասխան ամերիկյան հարվածների՝ բալիստիկ հրթիռներ է արձակել Հորդանանի Աքաբա քաղաքում գտնվող ամերիկյան ռազմական օբյեկտի ուղղությամբ։ Հորդանանի զինված ուժերի տվյալներով՝ արձակված 13 հրթիռներից 10-ը որսվել են, իսկ երեքն ընկել են հեռավոր շրջաններում։ Տուժածներ չկան։
Հրթիռային և ԱԹՍ-ների հարվածների մասին հաղորդվել է նաև Քուվեյթում, Բահրեյնում և Իրաքյան Քուրդիստանում գտնվող ամերիկյան թիրախների ուղղությամբ։
ԱՄՆ նախագահ Դոնալդ Թրամփը նախապես զգուշացրել էր, որ Իրանի հակահարվածի դեպքում Միացյալ Նահանգները կհարվածի «շատ ավելի ուժեղ և ավելի բարձր մակարդակով»։