Հայաստանի վարչապետ Նիկոլ Փաշինյանը Ռուսաստանի նախագահ Վլադիմիր Պուտինիի հետ հանդիպումից հետո հայտարարել է՝ «պայմանավորվեցինք անկեղծ և կառուցողական խոսակցությունը շարունակել Մոսկվա կատարելիք իմ առաջիկա այցի ընթացքում»։
«Շատ լավ հանդիպում ունեցա ՌԴ նախագահ Վլադիմիր Պուտինի հետ։ Եվ պայմանավորվեցինք անկեղծ և կառուցողական խոսակցությունը շարունակել Մոսկվա կատարելիք իմ առաջիկա այցի ընթացքում։ Պետք է արձանագրել, որ Հայաստան-Ռուսաստան հարաբերությունները երկու երկրների համար չափազանց կարևոր են, և մենք շատ խնամքով ենք վերաբերվում այդ հարաբերություններին, ՌԴ-ն էլ նախագահ Պուտինի գլխավորությամբ խնամքով է վերաբերվում», – ֆեյսբուքյան լայվում նշեց Փաշինյանը:
«Բայց նաև պետք է արձանագրել, որ նոր միջավայրում, նոր պայմաններում այդ հարաբերությունները վերաձևակերպելու անհրաժեշտություն կա և այդ վերաձևակերպման արդյունքում, ասաց Հայաստանի վարչապետը՝ համոզմունք հայտնելով, որ «հարաբերությունները կլինեն ավելի լավ, ավելի կառուցողական, ավելի փոխշահավետ և ավելի ջերմ»:
Ռուսաստանի նախագահն այսօր Փաշինյանի հետ հանդիպմանն առաջարկել է «Հայաստանի ժողովրդին ընտրելու հնարավորություն տալ Եվրամիության անդամակցելու հարցով, մարդկանց հարցնել՝ ի՞նչ են ուզում»:
«Հայաստանի՝ այլ կազմակերպությանն անդամակցելու գործընթացը սկսելու մասին օրենքի ընդունումը նշանակում է գործող կազմակերպությունից դուրս գալու մասին հայտարարություն», – ասել է Պուտինը Փաշինյանին՝ անդրադառնալով մեկուկես տարի առաջ Հայաստանի Ազգային ժողովի ընդունած օրենքին, որը ազդարարում է Երևանի՝ Եվրամիությանն անդամակցության գործընթացի մեկնարկը:
Վարչապետ Փաշինյանն էլ պնդեց, որ Եվրամիության անդամակցության օրենքի ընդունումով Հայաստանը չի խախտել ԵԱՏՄ-ում որևէ պարտավորություն. «Այդ հարցն այնքան չի հասունացել, որ դրվի ժողովրդական հանրաքվեի, մենք այդ օրենքն ընդունել ենք, որպեսզի հանրաքվե չանցկացնենք»: