«Երևան-Կենտրոն» քրեակատարողական հիմնարկից մի շարք կալանավորների տեղափոխել են այլ ՔԿՀ-ներ՝ խցերում տեղեր ազատելով, գրել է «Հրապարակ» թերթը՝ հղում անելով իր աղբյուրներին։
Թերթի տվյալներով՝ մինչև ՀՀ նախկին նախագահ Ռոբերտ Քոչարյանի և նրա որդու՝ Սեդրակ Քոչարյանի կալանավորումը գրեթե բոլոր խցերից մեկական կալանավոր է տեղափոխվել այլ քրեակատարողական հիմնարկներ։ Պարբերականը գրել է, որ անցած շաբաթվա վերջին ևս մի քանի կալանավոր է տեղափոխվել «Երևան-Կենտրոն» ՔԿՀ-ից։
«Հրապարակ»-ի տեղեկություններով՝ հիմնարկն ունի 13 խուց, որոնցից հինգը մեկտեղանոց են, իսկ մյուսները նախատեսված են մինչև հինգ անձի համար։ Մեկտեղանոց խցերում ներկայում պահվում են «Հոկտեմբերի 27-ի» գործով ցմահ ազատազրկման դատապարտված Նաիրի Հունանյանն ու նրա եղբայրը, ինչպես նաև «Բարգավաճ Հայաստան» կուսակցության առաջնորդ Գագիկ Ծառուկյանը, ՀՀ նախկին նախագահ Ռոբերտ Քոչարյանը և Երևանի նախկին քաղաքապետ Գագիկ Բեգլարյանը։
Թերթը ենթադրում է, որ վերջին տեղափոխումները կարող են կապված լինել հնարավոր նոր կալանավորումների հետ, սակայն նշում է, որ այդ մասին հաստատված տեղեկություն չկա։
«Երևան-Կենտրոն» ՔԿՀ-ում այս պահին պահվում են նաև Ծառուկյանի փեսան՝ Արգամ Աբրահամյանը, Քոչարյանի ավագ որդին՝ Սեդրակ Քոչարյանը և «Մայր Հայաստան» կուսակցության առաջնորդ Անդրանիկ Թևանյանը։ Ըստ թերթի՝ նրանք գտնվում են մի քանի անձի համար նախատեսված խցերում։
Դատարանը Ռոբերտ Քոչարյանի նկատմամբ երկամսյա կալանքի է կիրառել օգոստոսի 27-ին, դրանից մեկ օր առաջ նրա որդու՝ Սեդրակ Քոչարյանի նկատմամբ էր երկամսյա կալանք կիրառվել, այդ գործով կալանավորվել էր նաև Բեգլարյանը։ Օգոստոսի 9-ին կալանավորվել էր Արգամ Աբրահամյանը, իսկ հուլիսի 7-ին նրա աները՝ Գագիկ Ծառուկյանը։ Պետական դավաճանության գործով մայիսի 23-ին կալանավորվել էր Թևանյանը։
