Հասարակական գործիչ Կարեն Հեքիմյանի ֆեյսբուքյան գրառումը. «Ծառուկյան Գագիկ, Քոչարյան Ռոբերտ, Անդրանիկ Թևանյան… Վերջիններս, ինչպես նաև քաղաքականացված այլ անձինք կալանավորված են: Արդյո՞ք նրանք քաղբանտարկյալներ են:
Հարցը շատ պարզունակ է: Դրան պատասխանելու համար, անհրաժեշտ է պատասխանել մեկ այլ հարցի, այն է՝ արդյո՞ք Ծառուկյան Գագիկը, Քոչարյան Ռոբերտը և Անդրանիկ Թևանյանը կալանավորված կլինեին, եթե չզբաղվեին քաղաքականությամբ: Այլ կերպ ասած՝ «աջը քաշած ապրեին»: Վստահ եմ՝ նրանք չէին կալանավորվի այնպես, ինչպես կալանավորված չեն նույն ժամանակահատվածում, նույն գործունեությամբ զբաղվողները, որոնք կամ հեռու են մնում քաղաքականությունից, կամ լոյալություն են ցուցաբերում օրվա իշխանության նկատմամբ: Ստացվում է՝ Ծառուկյան Գագիկը, Քոչարյան Ռոբերտը և Անդրանիկ Թևանյանը քրեորեն հետապնդվում են, քանզի հանդգնել են քաղաքականությամբ զբաղվել:
Այդ դեպքում, ինչո՞ւ միջազգային կազմակերպություններն ու օտարերկրյա պետությունները վերջիններիս քաղբանտարկյալի կարգավիճակ չեն տալիս, հետևաբար՝ նրանց ազատ արձակելու համար Հայաստանի վրա ճնշում չեն գործադրում:
Մեծ հաշվով, հասկանալի է (սակայն ընդունելի չէ) Արևմտյան պետությունների և կազմակերպությունների դիրքորոշումը: Վերջիններիս համար Ծառուկյան Գագիկը, Քոչարյան Ռոբերտը և Անդրանիկ Թևանյանն ապրիորի ռուսական ազդեցության գործիչներ են, հետևաբար՝ տրամաբանված չէ նրանց պաշտպանելը: Իսկ Ռուսաստա՞նը: Պարադոքս է, չէ՞, որ Ռուսաստանը, գոնե առերևույթ, չի պաշտպանում մարդկանց, որոնք ջանք ու եռանդ չեն խնայել Հայաստանի «ռուսիֆիկացման» համար: Կալանավորվածներից մեկը Ռուսաստանի, մյուսը Բելառուսի նախագահի ընկերն է: Բացի դրանից՝ հավատացնում եմ, որ «ռուսական աշխարհում» ևս շատ են իրավապաշտպան կառույցները: Ի վերջո՝ Ռուսաստանում կան Զախարովան, Պեսկովը և մնացածները: Բոլորը, մեծ հաշվով, լուռ են: Երբեմն, նրանց շուրթերից «ուշադիր հետևում ենք»-ի տիպի հայտարարություններ են հնչում: Ի՞նչ է դա նշանակում: Առնվազն դա նշանակում է, որ կամ Ծառուկյան Գագիկը, Քոչարյան Ռոբերտը և Անդրանիկ Թևանյանն իրականում որևէ կապ չունեն Ռուսաստանի հետ, կամ Ռուսաստանը նրանց «գցում է»: Կա մեկ տարբերակ ևս, այն է՝ օրվա իշխանությունը շատ ավելի «ռուսական է», քան Ծառուկյան Գագիկը, Քոչարյան Ռոբերտը և Անդրանիկ Թևանյանը միասին վերցրած: Ի դեպ, վերջին վարկածը շատ իրատեսական է»: