ՀՀ ՆԳՆ ոստիկանության պարեկային ծառայության կողմից կազմված վարչական իրավախախտումների վերաբերյալ արձանագրությունների վիճակագրությունը ցույց է տալիս, որ վերջին տարիներին զգալիորեն աճել է ճանապարհային երթևեկության կանոնները խախտող հետիոտների, հեծանվորդների, ուղևորների և ճանապարհային երթևեկության այլ մասնակիցների նկատմամբ կազմված արձանագրությունների թիվը։
Խոսքը Վարչական իրավախախտումների վերաբերյալ օրենսգրքի 131-րդ հոդվածի 1-ին մասով նախատեսված խախտումների մասին է։ Դրանց շարքում են ճանապարհային երթևեկության կանոնները խախտելը, կարգավորման ազդանշաններին չենթարկվելը, ինչպես նաև ճանապարհային նշանների կամ գծանշումների պահանջները չկատարելը՝
- առաջացնում է տուգանքի նշանակում` սահմանված նվազագույն աշխատավարձի եռապատիկի չափով։
Iravaban.net–ի հարցմանն ի պատասխան՝ Ներքին գործերի նախարարությունից հայտնել են, որ 2021 թվականի հուլիսի 7-ից մինչև դեկտեմբերի 31-ը, ինչպես նաև 2022-2023 թվականներին, այս հոդվածով վարչական իրավախախտման վերաբերյալ արձանագրություններ չեն կազմվել։
Իրավիճակը փոխվել է 2024 թվականից․ այդ տարի արձանագրվել է 37 դեպք։
2025 թվականին ցուցանիշը հասել է արդեն 625-ի, այսինքն՝ մեկ տարվա ընթացքում արձանագրությունների թիվն աճել է շուրջ 17 անգամ։
2026 թվականի առաջին կիսամյակում, սակայն, կազմվել է 39 արձանագրություն։
Ի՞նչ է ցույց տալիս վիճակագրությունը
Եթե 2021-2023 թվականներին այս հոդվածով արձանագրությունների բացակայություն է արձանագրվել, ապա 2024 թվականից սկսած նկատվում է իրավախախտումների արձանագրման ակտիվացում։
Առանձնապես ուշագրավ է 2025 թվականի ցուցանիշը, երբ արձանագրությունների թիվը միանգամից հասել է 625-ի։ 2026 թվականի առաջին վեց ամիսների 39 արձանագրությունը նախորդ տարվա նույն ժամանակահատվածի համեմատ համադրելի տվյալների բացակայության պայմաններում ամբողջական պատկեր չի տալիս, սակայն ցույց է տալիս, որ նման խախտումների նկատմամբ վարչական արձանագրումներ շարունակում են կազմվել։
Միաժամանակ, միայն արձանագրությունների թվից հնարավոր չէ եզրակացնել, որ ճանապարհային կանոնների խախտումների իրական թիվն աճել կամ նվազել է նույն չափով։ Ցուցանիշի փոփոխության վրա կարող են ազդել նաև պարեկային ծառայության վերահսկողության ինտենսիվությունը, իրավախախտումների հայտնաբերման մեխանիզմները և վարչական պատասխանատվության կիրառման պրակտիկան։
Ո՞վ կարող է հայտնվել այս հոդվածի ներքո
131-րդ հոդվածի 1-ին մասը վերաբերում է այն ճանապարհային երթևեկության մասնակիցներին, որոնք տրանսպորտային միջոցների վարորդներ չեն։
Այսինքն՝ խոսքը կարող է վերաբերել, օրինակ, հետիոտներին, հեծանվորդներին, ուղևորներին և ճանապարհային երթևեկության այլ մասնակիցներին, եթե նրանք խախտում են երթևեկության կանոնները կամ չեն ենթարկվում կարգավորման ազդանշաններին, ճանապարհային նշանների կամ գծանշումների պահանջներին։
Այսպիսով, ոստիկանության ներկայացրած տվյալները ցույց են տալիս, որ 2024 թվականից այս ոլորտում արձանագրվող վարչական իրավախախտումների թիվը զգալիորեն աճել է, իսկ ամենաբարձր ցուցանիշը գրանցվել է 2025 թվականին՝ 625 արձանագրություն։
Ժամանակագրություն
- 2021թ․ հուլիսի 7 – դեկտեմբերի 31՝ 0 արձանագրություն
- 2022թ․՝ 0
- 2023թ․՝ 0
- 2024թ․՝ 37
- 2025թ․՝ 625
- 2026թ․ առաջին կիսամյակ՝ 39