ԱՄՆ Պետդեպարտամենտի խոսնակ Թոմի Պիգոտը հայտարարել է, որ Վաշինգտոնը շուտով կսկսի կոնկրետ միջոցներ ձեռնարկել Իրանի տնտեսության վրա ճնշումը մեծացնելու համար։
«Մենք թույլ չենք տա որևէ կազմակերպության շարունակել գործել այս հակամարտության ընթացքում առաջացած «մոխրագույն գոտում»: Մենք շատ շուտով կոնկրետ միջոցներ կձեռնարկենք: Դրանք կհետևեն ԱՄՆ ֆինանսների նախարարի կողմից շատ վճռականորեն արտահայտված նախազգուշացմանը», – ասել է նա «Ալ Ջազիրա»-ին տված հարցազրույցում։
Ըստ Պիգոտի, ԱՄՆ ֆինանսների նախարարությունը նույնականացրել է բոլոր այն կազմակերպություններին, որոնք այս կամ այն կերպ օգնում են Իրանի կառավարությանը լուծել իր ֆինանսական խնդիրները։
«Մենք հստակեցնում ենք, որ միջոցներ կձեռնարկենք՝ ապահովելու համար, որ իրանական ռեժիմը չունենա ֆինանսավորման որևէ աղբյուր», – ասել է նա։
Երեքշաբթի ԱՄՆ ֆինանսների նախարար Սքոթ Բեսենթը զգուշացրել է, որ Վաշինգտոնը պատրաստ կլինի երկրորդական պատժամիջոցներ կիրառել Իրանի հետ որոշակի առևտրային գործարքներ իրականացնող կողմերի նկատմամբ: Բեսենթի խոսքով՝ ԱՄՆ-ն կտեղեկացնի մյուս երկրներին, թե որքան ժամանակ ունեն Թեհրանի հետ որոշակի փոխազդեցությունները դադարեցնելու համար։