Ղազախստանի խորհրդարանական ընտրություններում նախագահամետ «Ադիլետ» («Արդարություն») կուսակցությունը ստացել է ձայների 71.17%-ը, օգոստոսի 24-ին Աստանայում հայտարարել է երկրի Կենտրոնական ընտրական հանձնաժողովը՝ ներկայացնելով քվեարկության նախնական արդյունքները։
Ըստ ԿԸՀ-ի՝ «Ադիլետ»-ից բացի, Ղազախստանի միապալատ խորհրդարանում՝ Կուրուլտայում, ներկայացված կլինի ևս չորս կուսակցություն։ Ընտրական 5%-ի շեմը հաղթահարել են «Աուիլ» («Գյուղ») կուսակցությունը՝ ստանալով ձայների 6.26%-ը, «Ռեսպուբլիկա» («Հանրապետություն») կուսակցությունը՝ 5.56%-ը, «Ակ Ժոլ» («Լուսավոր ուղի») կուսակցությունը՝ 5.21%-ը, և Ազգային սոցիալ-դեմոկրատական կուսակցությունը՝ 5.11%-ը։
Ղազախստանի ժողովրդական կուսակցությունը և «Բայթակ» («Տիեզերք») կանաչների կուսակցությունը չեն հաղթահարել 5%-ի շեմը և խորհրդարանում ներկայացված չեն լինի։
Օգոստոսի 23-ին կայացած ընտրություններում ընտրողների 2.51%-ը քվեարկել է բոլոր թեկնածուների դեմ։