Թուրքիան «չի ընկնի Սիրիայի հարցում Նեթանյահուի լարած ծուղակը». – հայտարարությունը, որ տարածել է երկրի նախագահի աշխատակազմը, հնչում է Իսրայելի և Թուրքիայի միջև Սիրիայի շուրջ աճող լարվածության ֆոնին։
Օգոստոսի 18-ին Իսրայելը հարվածել էր Սիրիայի Իդլիբ նահանգի «Աբու ադ-Դուհուր» ռազմական օդանավակայանին՝ պնդելով, թե Սիրիան պատրաստվում էր այնտեղ թուրքական զորքեր տեղակայել։ Անկարան և Դամասկոսը հերքել են այդ պնդումը։
Իսրայելի վարչապետ Բենյամին Նեթանյահուն հայտարարել է, որ Իսրայելը չի հանդուրժի Սիրիայում թուրքական ռազմական ներկայություն, որը կարող է սպառնալ իր անվտանգությանը։
Իսկ Թուրքիայի իշխանությունները Իսրայելի մեղադրանքները որակել են որպես հարվածը արդարացնելու փորձ և հայտարարել, որ դրանք կապված են Նեթանյահուի՝ տարածաշրջանում «ընդլայնվողական և ապակայունացնող քաղաքականության» հետ։