Դատական համակարգի բարեփոխումների նոր փուլի հիմքում դրվելու է իրավունքի գերակայության ամրապնդումն ու դատարանների նկատմամբ հանրային վստահության բարձրացումը։ Նպատակն է ձևավորել համակարգ, որի որոշումների օրինականությանը, մասնագիտական որակին և անաչառությանը հավասարապես կվստահեն քաղաքացիները, բիզնեսը և պետությունը։ Այս մասին Iravaban.net-ը տեղեկանում է Կառավարության ծրագրից։ Ըստ ծրագրի՝
Դատական համակարգի բարեփոխումների առանցքում է իրավունքի գերակայության ամրապնդումը, որպեսզի քաղաքացին, բիզնեսը և պետությունը հավասարապես վստահեն դատարանների որոշումների օրինականությանը, մասնագիտական որակին և անաչառությանը։
Դատական համակարգի նկատմամբ հանրային վստահության բարձրացման համատեքստում՝
- Դատական համակարգի անկախության ամրապնդման նպատակով կատարելագործվելու են դատավորների կրթության, ընտրության, նշանակման, գնահատման, առաջխաղացման և պատասխանատվության ընթացակարգերը:
- Դատական ընթացակարգերն ամբողջությամբ թվայնացվելու են միասնական թվային համակարգի ներդրմամբ, որը կենտրոնացնելու է բոլոր դատավարությունների կառավարումը՝ փոխարինելով ներկայիս մասնատված համակարգերին:
- Անձանց դատական պաշտպանության իրավունքի լիարժեք իրացման նպատակով շարունակաբար ներդրվելու են դատարաններում գործերի արդյունավետ և ողջամիտ ժամկետներում քննության մեխանիզմներ, որոնք նպաստելու են դատարանների ծանրաբեռնվածության նվազեցմանը, ինչպես նաև ապահովելու են արդյունավետ դատական քննության իրականացումը:
- Դատարանների բնականոն գործունեության, մատչելիության և արդարադատության իրականացման պատշաճ պայմանների ապահովման նպատակով մշակվելու են դատարանների շենքային և նյութատեխնիկական ապահովման միասնական ստանդարտներ, և փուլային եղանակով ապահովվելու է դրանց ներդրումը:
- Բարելավվելու է փորձագիտական գործունեության ոլորտը՝ միասնական օրենսդրության մշակման, փորձագետների որակավորման և փորձաքննությունների իրականացման չափանիշների ներդրման, փորձագիտական հաստատությունների կարողությունների՝ միջազգային չափանիշներին համընթաց զարգացման միջոցով:
- Ապահովվելու է դատաիրավական համակարգի մասնագիտական կարողությունների և Արդարադատության ակադեմիայի համապարփակ զարգացումը՝ հետազոտական և վերլուծական կենտրոնի ստեղծման, կրթական ծրագրերի շարունակական արդիականացման միջոցով։