Ինչպես տեղեկացնում է Iravaban.net-ը, 2026 թվականի նոյեմբերի 1-ից ուսումնական հաստատությունների և կազմակերպությունների համար կսահմանվի նոր վարչական պատասխանատվություն՝ օտարերկրացի ուսանողի կրթության (ուսումնառության) դադարեցման կամ համապատասխան պայմանագրի լուծման մասին սահմանված ժամկետում պետական մարմնին չհայտնելու դեպքում։
Նոր կարգավորումն ամրագրվել է Վարչական իրավախախտումների վերաբերյալ ՀՀ օրենսգրքում կատարված լրացմամբ։
Ի՞նչ պարտավորություն է սահմանվում
Եթե ուսումնական հաստատությունը կամ կազմակերպությունը օտարերկրացու հետ կնքված կրթության (ուսումնառության) մասին պայմանագիրը լուծում է կամ օտարերկրացու կրթությունը դադարեցվում է, ապա այդ մասին պետք է սահմանված կարգով տեղեկացնի միգրացիայի և քաղաքացիության բնագավառում պետական կառավարման լիազոր մարմնին։
Տեղեկացումը պետք է կատարվի պայմանագրի լուծման կամ կրթության դադարեցման օրվանից 10 օրվա ընթացքում։
Ի՞նչ կլինի, եթե տեղեկությունը չներկայացվի
Սահմանված 10-օրյա ժամկետում չհայտնելու դեպքում նախատեսվում է տուգանք՝ նվազագույն աշխատավարձի 50-ապատիկի չափով։
Հայաստանում նվազագույն ամսական աշխատավարձը 75 000 դրամ լինելու դեպքում դա կազմում է 3 750 000 դրամ։
Կրկնակի խախտման դեպքում
Եթե նույն արարքը վարչական տույժ նշանակելու մասին որոշման բողոքարկման ժամկետը լրանալուց հետո՝ մեկ տարվա ընթացքում, կրկին կատարվի, տուգանքը կկազմի նվազագույն աշխատավարձի 100-ապատիկը, այսինքն՝ 7 500 000 դրամ։
Այսպիսով, նոր կարգավորմամբ ուսումնական հաստատությունների և կազմակերպությունների համար սահմանվում է ոչ միայն օտարերկրյա ուսանողների կրթության դադարեցման մասին ժամանակին տեղեկացնելու պարտավորություն, այլև այդ պահանջը չկատարելու համար էական վարչական պատասխանատվություն։
Օրենքն ընդունվել է 2026 թվականի հունվարի 20-ին և ուժի մեջ է մտնելու 2026 թվականի նոյեմբերի 1-ից։
Ծանուցում 1. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։
Ծանուցում 2. սույն նյութի պատկերը գեներացվել է արհեստական բանականության գործիքակազմի օգնությամբ։