Իշխող ուժը փաստացի թշնամի է հռչակել Հայ դատի ցանցին և ազդեցիկ հայերին. Քրիստինե Վարդանյան

ԱԺ «Հայաստան» խմբակցության պատգամավոր Քրիստինե Վարդանյանը տեսանյութ է հրապարակել՝ անդրադառնալով իշխանության ներկայացուցչի՝ Սփյուռքի դերի և ազդեցության վերաբերյալ հայտարարություններին։

«Սփյուռքն ունի բազմաթիվ կենտրոններ։ Սփյուռքի կառույցները ցանցային կառույցներ են։ Սփյուռքի ազդեցիկ կառույցներ կան աշխարհի ավելի քան 20 երկրներում։ Ի՞նչն է խնդիրը։ Ցանցային կառույց ունենալու դեպքում քաշային կատեգորիան նվազո՞ւմ է ու ազդեցությունը՝ թուլանո՞ւմ։ Հակառակը՝ ուժեղանում է և բազմապատկվում»,- նշել է պատգամավորը։

Նրա գնահատմամբ՝ իշխանության խնդիրը ոչ թե Սփյուռքի ապակենտրոնացված լինելն է, այլ այն, որ Սփյուռքում կան ազդեցիկ կառույցներ և անհատներ, որոնք շարունակում են առաջ մղել հայկական օրակարգը։

Վարդանյանը, մասնավորապես, նշել է Հայոց ցեղասպանության միջազգային ճանաչման, Հայաստանի անվտանգության, գերիների վերադարձի և Հայաստանի տարածքային ամբողջականության հարցերը։

Պատգամավորի պնդմամբ՝ Սփյուռքի որոշ կառույցներ և անհատներ կարողանում են այդ հարցերը բարձրացնել տարբեր երկրների ղեկավարների հետ հանդիպումներում և նպաստել համապատասխան բանաձևերի ընդունմանը։

«Եթե իրենք ենթարկվել են Ադրբեջանի ու Թուրքիայի պահանջներին, իրենց տրամաբանությամբ՝ հայկական աշխարհում չպետք է մնա կառույց ու անհատ, որը չի ենթարկվել այդ պահանջներին։ Դրա համար էլ Ադրբեջանին ու Թուրքիային զուգահեռ հիմա իշխող ուժը փաստացի թշնամի է հռչակել Հայ դատի ցանցին, թշնամի է հռչակել ազդեցիկ հայերին»,- հայտարարել է Վարդանյանը։

Նա նաև հարց է բարձրացրել, թե ինչու Հայաստանը չպետք է օգտագործի Սփյուռքի ազդեցիկ ներկայացուցիչների կապերն ու հնարավորությունները՝ պետական շահերն առաջ մղելու նպատակով՝ որպես օրինակ հիշատակելով Իսրայելի փորձը։

Վարդանյանի համոզմամբ՝ Հայաստանն անհամեմատ ավելի մեծ հնարավորություններ կարող է ունենալ, եթե համագործակցի ԱՄՆ-ում, Կանադայում, Ռուսաստանում, Իրանում, Ավստրալիայում և եվրոպական երկրներում բնակվող կազմակերպված հայկական համայնքների հետ։