Չինաստանում ցածր բյուջեով նկարահանված «Նիու Լայ» անիմացիոն ֆիլմը, որը սկզբում գրեթե ոչ մի ուշադրության չէր արժանացել, սոցցանցերում վիրուսային դառնալուց հետո անսպասելիորեն դարձել է կինովարձույթի հիթ։
Ֆիլմը պատմում է երազում հայտնված կովի մասին և աչքի է ընկնում խճճված սյուժեով ու անորակ գրաֆիկայով։ Թողարկումից հետո առաջին 10 օրերին այն վաստակել էր ընդամենը 7 705 յուան (1 140 դոլար), սակայն այժմ ֆիլմի հասույթը գերազանցել է 11,4 միլիոն յուանը (մոտ 1,69 միլիոն դոլար)։
Ֆիլմի անսպասելի հաջողությունը մեծապես պայմանավորված է սոցցանցերում տարածվող տեսանյութերով և օգտատերերի արձագանքներով։ Շատերը «Նիու Լային» համարում են արհեստական բանականությամբ ստեղծվող անորակ բովանդակության հակաթույն՝ ընդգծելով, որ ֆիլմը, իրենց կարծիքով, ստեղծվել է «ձեռքի աշխատանքով»։
«Եթե դիտեք, գուցե 80 րոպե զղջաք, բայց եթե չդիտեք, ամբողջ կյանքում կզղջաք»,- ֆիլմի մասին տարածված գրառումներից մեկում գրել է օգտատերը։
Մեկ այլ օգտատեր ֆիլմն անվանել է ամառային կինոսեզոնի ամենամեծ «սև ձին»՝ նկատի ունենալով դրա անսպասելի հաջողությունը։
Ֆիլմի նկատմամբ հետաքրքրությունն այնքան է աճել, որ կինոթատրոնները սկսել են ավելացնել դրա ցուցադրությունների թիվը։ Քանի որ ֆիլմը նույնիսկ պատշաճ գովազդային պաստառ չունի, որոշ կինոթատրոնների աշխատակիցներ սեփական ձեռքով են պաստառներ պատրաստում՝ հանդիսատեսին գրավելու համար։
Ֆիլմի անվանումը ևս դարձել է կատակների և քննարկումների առիթ։ Չինարենում «ցուլ» և «կով» բառերը գրվում են նույն հիերոգլիֆով, ինչի պատճառով որոշ օգտատերեր ֆիլմի հաջողությունը կապում են նաև ֆոնդային շուկայի սպասվող աճի հետ։
«Եթե ինդեքսը վաղը հասնի 4 000-ի, կգնամ կինոթատրոն՝ այս ֆիլմին աջակցելու»,- գրել է Weibo-ի օգտատերերից մեկը։
«Սա սարսափելի ֆիլմ է, բայց հիանալի անուն ունի»,- գրել է մեկ այլ օգտատեր՝ ֆիլմը կապելով ֆոնդային ներդրումների հետ։
«Նիու Լայը» ի սկզբանե ցածր բյուջեով և գրեթե աննկատ ստեղծված ֆիլմ էր։ Այս ամսվա սկզբին թողարկվելուց առաջ այն գրեթե ոչ մի գովազդ չէր ստացել։
Սակայն այժմ ֆիլմն այնքան մեծ պահանջարկ ունի, որ կինոթատրոններն ավելացրել են դրա ցուցադրությունների թիվը՝ արձագանքելով աճող հետաքրքրությանը։
Քանի որ ֆիլմը նույնիսկ պատշաճ գովազդային պաստառ չունի, կինոթատրոնների աշխատակիցները ստիպված են եղել սեփական ձեռքով պաստառներ նկարել՝ հանդիսատեսին ֆիլմը դիտելու հրավիրելու համար։
Ֆիլմերի ցուցանիշներին հետևող Weibo-ի էջերից մեկը նշել է, որ գրանցված արդյունքն աննախադեպ է և, ամենայն հավանականությամբ, այդպիսին էլ կմնա։
Սակայն ոչ բոլորն են ուրախանում ֆիլմի անսպասելի հաջողությամբ։ Հանգստյան օրերին պետական «Beijing News»-ը հրապարակած մեկնաբանության մեջ նախազգուշացրել է, որ կինոթատրոնները կարող են «կորցնել հանդիսատեսի վստահությունը», եթե շարունակեն «իջեցնել իրենց չափանիշները» և ավելացնել «Նիու Լայի» ցուցադրությունները։
Մատնանշելով նախկինում ցածր որակի պատճառով ծաղրի ենթարկված ֆիլմերը՝ թերթը նշել է, որ «Նիու Լայը» «ևս մեկ անգամ իջեցրել է հանդիսատեսի՝ վատ պատրաստված ֆիլմերի նկատմամբ սպասելիքների նշաձողը»։
«Beijing News»-ը կինոթատրոններին կոչ է արել «հանդիսատեսի համար զտիչի դեր կատարել» և հստակ մերժել այն ֆիլմերը, որոնք ակնհայտորեն չեն համապատասխանում որակի չափանիշներին՝ թույլ չտալով, որ «Նիու Լայի» նման ֆիլմերը լայն տարածում ստանան։