Ֆրանսիայի հարավ-արևմուտքում գտնվող Լանդեր դեպարտամենտի Լյուգլոն համայնքի մոտակայքում մեկ գիշերվա ընթացքում այրվել է 1 580 հեկտար անտառ, հայտնել է CNews հեռուստաալիքը՝ հղում անելով տարածաշրջանի պրեֆեկտ Ժիլ Կլավարյոլին:
Հրդեհը նկատելիորեն ուժգնացել է գիշերը, իսկ առավոտյան կրակի տարածման մակերեսը հասել է 1 580 հեկտարի: Իրավիճակը բարդանում է շարունակվող շոգի և չոր եղանակի պատճառով, ինչի հետևանքով կրակը արագ է տարածվում նոր ուղղություններով:
Տեղում աշխատում են մեծ թվով հրշեջներ և փրկարարական ծառայություններ, որոնք փորձում են կասեցնել կրակի հետագա առաջխաղացումը դեպի մոտակա բնակավայրեր: Տեղական իշխանությունները հետևում են իրավիճակին և անհրաժեշտության դեպքում ձեռնարկում են անվտանգության միջոցներ բնակչությանը պաշտպանելու համար:
Սա արդեն մեկ ամսվա ընթացքում երկրորդ խոշոր հրդեհն է այս դեպարտամենտում։ Հուլիսի վերջին Բիսկարոս համայնքի տարածքում բռնկված հրդեհն ընդգրկել էր 3,7 հազար հեկտար տարածք, ինչի հետևանքով կրակը ոչնչացրել էր 200 շինություն։
Միևնույն ժամանակ, հարևան Ժիրոնդ դեպարտամենտում հրշեջները պայքարում էին խոշոր հրդեհի դեմ, որը պատել էր 42 հազար հեկտար տարածք։ Անտառային հրդեհների իրազեկման եվրոպական համակարգի տվյալներով՝ 2026 թվականի ընթացքում Ֆրանսիայում հրդեհներից տուժել է ընդհանուր առմամբ մոտ 100 հազար հեկտար տարածք։