ԱՄՆ նախագահ Դոնալդ Թրամփը հայտարարել է, որ Ռուսաստանը համաձայնել է ազատ արձակել ԱՄՆ քաղաքացի, նախկին ծովային հետևակային Ռոբերտ Գիլմանին։
Թրամփի խոսքով՝ Գիլմանը Ռուսաստանում բանտարկվել էր 2022 թվականին՝ Ջո Բայդենի նախագահության ընթացքում։ Նա նշել է, որ Ռուսաստանի նախագահ Վլադիմիր Պուտինի հետ իր քննարկումներից հետո Մոսկվան որոշել է Գիլմանին ազատ արձակել «հումանիտար հիմունքներով»։
ԱՄՆ նախագահն ընդգծել է, որ ազատ արձակման դիմաց որևէ անձ չի փոխանցվել Ռուսաստանին, և փոխանակում տեղի չի ունեցել։
Թրամփի հայտարարության համաձայն՝ Գիլմանը պետք է ժամանի Վաշինգտոնի Էնդրյուս ռազմաօդային բազա, որտեղ նրան դիմավորելու են ԱՄՆ նախագահի ներկայացուցիչները։ Նրանց թվում է նաև Գիլմանի մայրը՝ Նենսին, որը նրա հետ ինքնաթիռում է։
Թրամփը նշել է, որ անձամբ խոսել է Գիլմանի հետ, և վերջինս կատակով խնդրել է հայրենիք վերադառնալուց հետո իրեն «հիանալի չիզբուրգեր» մատուցել։
ԱՄՆ նախագահը նաև հայտարարել է, որ իր վարչակազմը առաջնահերթություն է տվել արտերկրում ձերբակալված ամերիկացիներին հայրենիք վերադարձնելու հարցին՝ պնդելով, որ իր պաշտոնավարման ընթացքում հարյուրավոր ամերիկացիներ վերադարձվել են իրենց ընտանիքների մոտ։
Թրամփը շնորհակալություն է հայտնել իր վարչակազմի մի շարք պաշտոնյաների, այդ թվում՝ խաղաղության առաքելությունների հարցերով հատուկ բանագնաց Սթիվ Ուիթքոֆին, պատանդների հարցերով հատուկ բանագնաց Ադամ Բյոլերին, ահաբեկչության դեմ պայքարի հարցերով ավագ տնօրեն Սեբաստիան Գորկային և Ջարեդ Քուշներին։