Առաջիկա ամիսներին Հայաստանում չի կարող անցկացվել հանրաքվե մի հարցի շուրջ, որը երկրում չի քննարկվել։ Այս մասին օգոստոսի 11-ին խորհրդարանում լրագրողների հետ զրույցում հայտարարեց իշխող «Քաղաքացիական պայմանագիր» խմբակցության պատգամավոր Սարգիս Խանդանյանը՝ մեկնաբանելով ԵԱՏՄ-ից դուրս գալու հնարավոր հանրաքվեի մասին խոսակցությունները։
«Հայաստանը ԵԱՏՄ-ի լիիրավ անդամ է, և առաջիկա ամիսներին մեր մասնակցությունը կշարունակվի թե՛ քաղաքական հարթությունում, թե՛ ֆինանսական միջոցների ծավալի առումով։ Հայաստանի անդամակցությունը բխում է ինչպես մեր երկրի, այնպես էլ ԵԱՏՄ մյուս անդամ պետությունների շահերից»,- նշեց նա։
Միևնույն ժամանակ Խանդանյանը պարզաբանեց, որ Եվրամիության հետ մերձեցման գործընթացը ներքին բնույթ է կրում։
Անդրադառնալով ՀԱՊԿ-ի թեմային՝ պատգամավորը նշեց, որ չի տեսնում ակտիվ աշխատանքի վերադառնալու հիմքեր. «Չեմ կարծում, որ կա պատճառ կամ հանգամանք, որը կարող է մեզ ստիպել ակտիվացնել մեր մասնակցությունը ՀԱՊԿ-ում»։
Խոսելով Վերին Լարսում ապրանքների արտահանման հետ կապված խնդիրների մասին՝ Սարգիս Խանդանյանը հույս է հայտնել, որ դրանք քաղաքական բնույթ չեն կրում, և հավաստիացրել է, որ Կառավարությունը գործընկերների հետ աշխատում է բիզնեսի կորուստները նվազեցնելու ուղղությամբ։