Հայ մշակույթն այսօր էլ հպարտանում է այն արվեստագետներով, ովքեր, ստանալով փայլուն մասնագիտական կրթություն արտասահմանում և ունենալով միջազգային հաջող կարիերա կառուցելու լայն հնարավորություններ, գիտակցաբար ընտրում են վերադարձը հայրենիք՝ իրենց փորձն ու գիտելիքը ծառայեցնելու հայկական մշակույթի զարգացմանը։ Այդպիսի նվիրյալ արվեստագետներից է ջութակահարուհի Աստղիկ Վարդանյանը, որի ստեղծագործական ուղին վաղուց արդեն դարձել է բարձր պրոֆեսիոնալիզմի, արվեստին անմնացորդ նվիրումի և մշակութային արժեքներին հավատարմության վառ օրինակ։
2011-ից Աստղիկ Վարդանյանը Հայաստանի ազգային կամերային նվագախմբի կոնցերտմայստերն է, և իր վարպետությամբ, երաժշտական լայնահուն մտածողությամբ և բացառիկ հեղինակությամբ նշանակալից դեր ունի նվագախմբի ստեղծագործական հաջողություններում։ Կոնցերտմայստերի առաքելությունը չի սահմանափակվում առաջին ջութակի պարտականություններով. նա հանդիսանում է նվագախմբի երաժշտական հենասյունը, դիրիժորի գլխավոր գործընկերը և կոլեկտիվի ստեղծագործական աշխատանքի համակարգողը։ Այս առումով կարելի է վստահաբար ասել, որ Աստղիկ Վարդանյանը տարիներ շարունակ փաստացի ղեկավարել է նվագախմբի երաժշտական կյանքը՝ ապահովելով բարձր կատարողական կուլտուրա, մասնագիտական մակարդակ և ստեղծագործական միասնականություն։
Նրա կատարողական արվեստը մշտապես առանձնացել է երաժշտական խորը զգացողությամբ, նուրբ ոճամտածողությամբ, տեխնիկական անթերի պատրաստվածությամբ և բեմական բարձր մշակույթով։ Որպես մենակատար, կամերային երաժիշտ և կոնցերտմայստեր՝ նա վայելել է գործընկերների, դիրիժորների և երաժշտասեր հանրության անկեղծ գնահատանքը՝ արժանիորեն ներկայացնելով հայկական ջութակի դպրոցի լավագույն ավանդույթները։
Աստղիկ Վարդանյանի ստեղծագործական գործունեության նոր և կարևոր էջերից է իր նախաձեռնությամբ հիմնադրված Armenian String Quartet լարային քառյակը։ Անսամբլը հաջողությամբ ներկայացնում է համաշխարհային դասական երաժշտության գլուխգործոցները՝ միաժամանակ առանձնահատուկ ուշադրություն դարձնելով հայկական երաժշտական ժառանգության և ժամանակակից հայ կոմպոզիտորների ստեղծագործությունների մեկնաբանությանը։ Քառյակի գործունեությունը վկայում է, որ Աստղիկ Վարդանյանը շարունակում է մնալ ստեղծագործական անսպառ եռանդով օժտված արվեստագետ, որը նոր գաղափարներով և բարձրարվեստ կատարումներով շարունակում է հարստացնել Հայաստանի երաժշտական կյանքը՝ արժանապատվորեն ներկայացնելով հայկական կատարողական արվեստը։