ԱԺ նախագահի տեղակալ Վահագն Ալեքսանյանը, խոսքն ուղղելով ընդդիմադիր պատգամավոր Էդգար Ղազարյանին, ասաց. «Եկեք ներողություն խնդրեք՝ հայ զինծառայողների մահը կամենալու համար: Հարգելի՛ «Ուժեղ Հայաստան», էս խոսակցությունը չի փակվելու, ձեր շարքերում նստած ա մարդ, ով կամեցել է, ուղիղ տեքստով ասել է հայ զինծառայողների մահը»:
Հիշեցնենք՝ 2 տարի առաջ «Հայելի» ակումբում ասուլիսի ժամանակ հասարակական, քաղաքական գործիչ Էդգար Ղազարյանն ասել էր․ «Արդեն երկրորդ դեպքն է, որ հայ սակրավորը պայթում է հայ զինվորի կողմից տեղադրված ականի վրա՝ ՀՀ ինքնիշխան տարածքում:
Մաղթում ենք, որ դա վերաբերվի բոլորին: Ինչքան հայ սակրավոր կմտնի ականապատ դաշտ, ցանկանում ենք, որ այնտեղից դուրս բերվի նրա մարմինը կամ վիրավոր մարմինը»։
Արդեն 9-րդ գումարման ԱԺ-ում ճեպազրույցի ժամանակ, պարզաբանելով ասածը, նորընտիր պատգամավոր Էդգար Ղազարյանը նշել էր. «Հատվածը 2024 թվականից է, հետևի նկարում Սրբազանի քայլերթի կադրերն են: Այդ ժամանակ հանձնարարական էին տվել հայ սակրավորներին, որպեսզի այն տարածքները, որ հանձնվելու են Ադրբեջանին, նրանք ականազերծեն, նոր հանձնեն: Ու դիմում էի սակրավորներին, ասում՝ ձեր խնդիրը էդ տարածքները ականապատելն է, ոչ թե ականազերծելը. դուք իրավունք չունեք ապօրինի հրաման կատարելու: Ասում էի՝ եթե ձեզ հանձնարարում են թշնամու առաջ ճանապարհ բացել, որ նրանք գան, մեր երեխեքին սպանեն, դա թշնամություն է, իսկ թշնամություն անողը պետք է պատժվի: Իմաստը դա էր»: