Իրանի արտաքին գործոց նախարար Ապպաս Արաղչի յայտնեց. «Ներկայիս Միացեալ Նահանգներու հետ չենք բանակցիր, որովհետեւ միջնորդներու ճամբով նամակներու փոխանակում տեղի կ՛ունենայ, սակայն այս հոլովոյթը բանակցութիւն չի նկատուիր»:
Ան ըսաւ, որ միջնորդները կը շարունակեն իրենց ջանքերը բանակցութիւնները վերսկսելու կարելիութիւն գտնելու համար` շեշտելով. «Մեր տեսակէտով, քանի տակաւին Միացեալ Նահանգներու կողմէ փոխըմբռնման յուշագիրի խախտման պարագաները չեն աւարտած, քանի տակաւին Ամերիկան իր խախտումներուն համար փոխհատուցում չէ տուած, բանակցութիւնները դարձեալ սկսելու կարելիութիւն չկայ»:
«Օմանի հետ Հորմուզի նեղուցին մէջ ծովային նոր ուղիի ճշդման վերաբերեալ բանակցութիւնները դրական կերպով կ՛ընթանան եւ վերջին փուլերուն մէջ են», յայտնեց իրանեան դիւանագիտութեան պետը` աւելցնելով. «Ասիկա Հորմուզի նեղուցի վերաբացում չի նշանակեր: Այս համաձայնութիւնը կրնայ գոյանալ, սակայն Հորմուզի նեղուցի վերաբացումը կախեալ կը մնայ շարք մը պայմաններէ»: