Իսպանիայի ԱԳՆ-ն անհիմն է համարել Իտալիայի որոշումը՝ միգրացիոն ճգնաժամի պատճառով Շենգենյան համաձայնագրի գործողությունը ժամանակավորապես կասեցնելու վերաբերյալ։ Այդ մասին հայտարարել է Իսպանիայի արտգործնախարար Խոսե Մանուել Ալբարեսը։
«Այս միջոցառումների կիրառման համար որևէ հիմք չկա։ Սեուտայում և Մելիլիայում իրավիճակը վերահսկվում է։ Սեուտա ապօրինի մուտք գործած մարդկանց մեծ մասն արդեն վերադարձել է հայրենիք»,- EFE գործակալությանը հայտնել է Ալբարեսը։
Նա ընդգծել է, որ եթե Հռոմը չգնա իրավիճակի լիցքաթափման և չվերացնի սահմանված սահմանափակումները, Մադրիդը կարող է պատասխան քայլեր ձեռնարկել՝ ի պաշտպանություն իսպանացի քաղաքացիների շահերի և արժանապատվության։
Միաժամանակ, Իտալիայի վարչապետ Ջորջա Մելոնիի գրասենյակից քննադատել են Իսպանիայի իշխանությունների արձագանքը՝ հայտարարելով, որ «Իտալիան ազգային անվտանգության հարցերում արտասահմանից ներկայացվող վերջնագրեր կամ ցուցումներ չի ընդունում»։
Ավելի վաղ Իտալիայի ներքին գործերի նախարար Մատեո Պյանտեդոզին, ԵՄ գործընկերների հետ արտակարգ տեսակոնֆերանսի ընթացքում, որը Հռոմի նախաձեռնությամբ գումարվել էր Սեուտայում ստեղծված միգրացիոն ճգնաժամի պատճառով, հայտարարել էր, որ Իսպանիայի հետ սահմանին Շենգենյան համաձայնագրի գործողության ժամանակավոր կասեցումը ժամանակավոր միջոց է և ուղղված չէ Մադրիդի դեմ։
Հուլիսի վերջին տասնյակ հազարավոր ապօրինի միգրանտներ լողալով կամ ալիքախախտը շրջանցելով՝ ոտքով հասել էին Իսպանիայի ինքնավար քաղաք Սեուտա, որը սահմանակից է Մարոկկոյին։ Ճգնաժամի ֆոնին Իսպանիայի իշխանությունները քաղաքում անվտանգության ապահովման համար ներգրավել էին նաև զինվորականներին։ Իսպանիայի կառավարության տվյալներով՝ Սեուտա հասնելու փորձի ընթացքում զոհվել է առնվազն 75 մարդ, մինչդեռ Ռաբաթը հայտնել է 11 զոհի մասին։