Ամերիկյան առաջնորդ Դոնալդ Թրամփը հայտարարել է, որ այժմ պատրաստ չէ հրապարակավ հանդես գալ ԱՄՆ գործող փոխնախագահ Ջեյ Դի Վենսին 2028 թվականի ընտրություններում պետական բարձրագույն պաշտոնի թեկնածու առաջադրելու օգտին:
Թրամփն օգոստոսի 6-ին բացասական է պատասխանել այն հարցին, թե արդյոք կարելի է համարել, որ ինքն արդեն հանդես է եկել ընտրություններում Վենսի թեկնածության աջակցությամբ:
Մեկնաբանելով The Washington Post թերթի հրապարակումը, որում ասվում է, թե նա մասնավոր զրույցում Հանրապետական կուսակցության հովանավորներին հայտնել է Վենսին նախագահի թեկնածու տեսնելու ցանկության մասին, Թրամփն ընդգծել է. «Ոչ: Ես վերջերս եմ լսել այդ մասին: Կարծում եմ՝ նա հիանալի է, բայց այժմ չափազանց վաղ է անգամ մտածել այդ մասին»:
Խոսելով այն ժամանակվա մասին, թե երբ ինքը կդադարի լինել ԱՄՆ նախագահ, Թրամփը նշել է.
«Դա կարող է լինել դեռ բավականին ոչ շուտով: Ով գիտի: Բայց դա կարող է լինել նաև բավականին շուտով։ Ասում են, որ դեռ երկուսուկես տարի կա: Կտեսնենք», – հավելել է նա:
Օրենքով Թրամփի երկրորդ ժամկետը նախագահի պաշտոնում պետք է ավարտվի 2029 թվականի հունվարին: ԱՄՆ Սահմանադրության 22-րդ փոփոխությունը, որն ընդունվել է 1951 թվականին, նախագահի պաշտոնավարումը սահմանափակում է երկու ժամկետով: Այնուամենայնիվ, ամերիկյան գործող առաջնորդը բազմիցս թույլ է տվել երրորդ ժամկետով վերընտրվելու ձգտելու հնարավորությունը:
Հիշեցնենք, որ ավելի վաղ Washington Post թերթը՝ հղում անելով աղբյուրներին, հայտնել էր, որ Թրամփը մասնավոր զրույցում արդեն որոշել է, որ փոխնախագահ Ջեյ Դի Վենսը պետք է դառնա Հանրապետական կուսակցությունից նախագահի թեկնածու 2028 թվականի ընտրություններում։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: