Իտալիայի իշխանությունները երկրի 27 խոշոր քաղաքներում հայտարարել են վտանգի ամենաբարձր մակարդակ՝ անոմալ շոգի պատճառով։ «Առաջին անգամ Իտալիայի առողջապահության նախարարության՝ շոգի վերաբերյալ նախազգուշացման համակարգում ընդգրկված բոլոր 27 խոշոր քաղաքներում այսօր հայտարարվել է վտանգի ամենաբարձր՝ «կարմիր» մակարդակը՝ այս տարվա արդեն չորրորդ շոգի ալիքի ֆոնին», – նշում է ANSA գործակալությունը։ Ըստ կանխատեսումների՝ ուժասպառ անող շոգը, որի ընթացքում որոշ շրջաններում օդի ջերմաստիճանը հասնում է 40°C-ի, կպահպանվի առնվազն ևս 10 օր։
Մասնավորապես, «կարմիր» նախազգուշացում է հայտարարվել Հռոմում, Բոլոնիայում, Նեապոլում, Միլանում, Վենետիկում, Վերոնայում, Ֆլորենցիայում, Պերուջայում, Պալերմոյում և Բարիում, այսինքն՝ երկրի գրեթե բոլոր խոշոր զբոսաշրջային կենտրոններում։ ANSA-ն պարզաբանում է, որ վտանգի երրորդ՝ «կարմիր» մակարդակը նշանակում է շոգի պատճառով արտակարգ իրավիճակ․ երկարատև բարձր ջերմաստիճանը լուրջ վտանգ է ներկայացնում առողջության համար, այդ թվում՝ երիտասարդ և առողջ մարդկանց։
Միաժամանակ, արևմտյան լրատվամիջոցների փոխանցմամբ, Հունգարիայի իշխանությունները շոգի պատճառով որոշել են անջատել երկրի ամենահայտնի շենքերից մի քանիսի լուսավորությունը՝ էլեկտրաէներգիա խնայելու նպատակով։ 2026 թվականի ամռանը եվրոպական մի շարք երկրներ բախվել են անոմալ շոգի, որի ընթացքում օդի ջերմաստիճանը որոշ վայրերում գերազանցում է 40°C-ը։ Շոգին զուգահեռ տարբեր երկրներում բռնկվել են նաև անտառային հրդեհներ։ Վերջին շաբաթներին հատկապես ծանր իրավիճակ է գրանցվել Ֆրանսիայում և Իսպանիայում։