Գազայի հատվածում տիրող իրավիճակի կարգավորման համար ստեղծված Խաղաղության խորհուրդը և միջնորդ պետությունները մտադիր են հասնել անկլավում էսկալացիայի նվազեցմանը՝ Իսրայելի կողմից հասցված հարվածների վերջին շարքից հետո, հայտնել է ՏԱՍՍ-ը՝ հղում անելով Գազայի հարցերով Խաղաղության խորհրդի բարձր ներկայացուցիչ Նիկոլայ Մլադենովին։
«Երկօրյա հարվածների հետևանքով Գազայի հատվածում խաղաղ բնակիչներ են զոհվել, ոչնչացվել են դեղորայքի պաշարներ, որոնցից կախված է բնակչության կյանքը։ Իմ թիմը եկուշաբթի օրվանից շուրջօրյա աշխատում է երկու կողմերի, միջնորդների և տարածաշրջանային գործընկերների հետ՝ իրավիճակը լիցքաթափելու և ԱՄՆ նախագահ Դոնալդ Թրամփի խաղաղության ծրագրի լիարժեք իրագործման համար պայմաններ ստեղծելու ուղղությամբ»,- X-ում գրել է Մլադենովը։
Նա ընդգծել է, որ երկու կողմերն էլ՝ և՛ Իսրայելը, և՛ պաղեստինյան «Համաս» շարժումը, պատասխանատվություն են կրում խաղաղ կարգավորման համաձայնագրի պայմանների կատարման համար։
Օգոստոսի 1-ին և 2-ին Իսրայելի պաշտպանության բանակի մամուլի ծառայությունը հայտնել էր «Համաս»-ի զինված գոյացությունների դիրքերին հասցված հարվածների մասին։ Մասնավորապես, ինչպես նշել է մամուլի ծառայությունը, ոչնչացվել են զենքի պահեստներ, ինչպես նաև սպանվել են երեք զինյալներ, այդ թվում՝ «Ջաբալիա» գումարտակի հրամանատարը։
Al Jazeera հեռուստաալիքը, հղում անելով անկլավի հիվանդանոցների աղբյուրներին, հայտնել է, որ իսրայելական հարձակումների հետևանքով զոհվել է առնվազն 19 պաղեստինցի։
Գազայի պատերազմն սկսվել էր 2023 թվականի հոկտեմբերի 7-ին՝ Իսրայելի հարավի վրա «Համաս»-ի հարձակումից հետո, որի հետևանքով, ըստ իսրայելական տվյալների, զոհվել էր մոտ 1200 մարդ, շուրջ 250-ը պատանդ էր վերցվել։ 2025 թվականի հունվարի 19-ին կողմերի միջև հրադադար էր ուժի մեջ մտել, սակայն մարտի 18-ին Իսրայելը վերսկսել էր հարվածները Գազայի ուղղությամբ։
2024 թվականի մայիսի 20-ին Միջազգային քրեական դատարանի դատախազ Քարիմ Խանը միջնորդություն էր ներկայացրել Իսրայելի վարչապետ Բենիամին Նեթանյահուի, Պաշտպանության նախկին նախարար Յոավ Գալանտի և ՀԱՄԱՍ-ի երեք առաջնորդի ձերբակալության օրդերներ տրամադրելու համար։ Նոյեմբերի 21-ին ՄՔԴ-ն օրդերներ էր տրամադրել Նեթանյահուի, Գալանտի և Մոհամեդ Դեյֆի նկատմամբ։
