Հայաստանի Սննդամթերքի անվտանգության տեսչական մարմինը հանրային սննդի ոլորտի ներկայացուցիչներին և զանգվածային միջոցառումների կազմակերպիչներին կոչ է արել ուժեղացնել սննդի պահպանման և մատուցման նկատմամբ վերահսկողությունը շոգ եղանակին:
Գերատեսչությունում խորհուրդ են տվել հատուկ ուշադրություն դարձնել աղցաններին և այն սառը ուտեստներին, որոնք պարունակում են մայոնեզ, թթվասեր, սերուցք և շուտ փչացող այլ բաղադրիչներ։ Բարձր ջերմաստիճանի պայմաններում սեղանին թողնված մթերքը կարող է արագորեն դառնալ բակտերիաների բազմացման միջավայր:
Մասնագետները խորհուրդ են տալիս ուտեստները պահել սառնարանում մինչև մատուցման պահը, իսկ սենյակային ջերմաստիճանում կամ բացօթյա պայմաններում երկար ժամանակ գտնվող մթերքները փոխարինել կամ հեռացնել։
Տեսչական մարմնից ընդգծել են, որ այս կանոնների պահպանումը կօգնի կանխել սննդային թունավորման դեպքերը:
