Հասարակական գործիչ Կարեն Հեքիմյանի ֆեյսբուքյան գրառումը. «Որտե՞ղ է կաթողիկոսը:
Այսօր՝ ԱԺ բացման արարողությանն օրվա իշխանությունը կաթողիկոսին չէր հրավիրել: Ընդդիմադիրները «Որտե՞ղ է կաթողիկոսը» կարգախոսով բողոքի ակցիա իրականացրեցին:
Դատապարտելի է անձնական դրդապատճառներից ելնելով ավանդույթի՝ հովվապետական օրհնանքի, չեղարկումը, սակայն…
Նախ՝ ընդդիմությունը խոսույթի մակարդակով 2026 թվականի ԱԺ ընտրություններն անարդար է որակում, հետևաբար՝ ԱԺ-ն ոչ լեգիտիմ: Այդ դեպքում, կաթողիկոսը ոչ լեգիտիմ ԱԺ գար, որ ի՞նչ աներ: Անարդարությո՞ւնն օրհներ: Այս իմաստով, կաթողիկոսի ԱԺ-ի բացման արարողությանը չմասնակցելն արդարացված է: Թեպետ, կաթողիկոսը կարող էր (միգուցե՝ պարտավոր էր) ԱԺ չգալով, ինչ-որ բան ասել: Օրինակ՝ բացահայտեր իր վերաբերմունքն ընթացող գործընթացները հանդեպ:
Մյուս կողմից՝ եթե կաթողիկոսին չեն հրավիրել, ապա ինչո՞ւ ինքը չէր եկել: Առանց հրավերի: Կաթողիկոսի առջև դուռ փակելով, օրվա իշխանություններն աշխարհի առաջ խայտառակ կլինեին: Բացի դրանից՝ եկեք հիշենք, որ ոչ թե ժողովուրդն էր գնում Հիսուս Քրիստոսի մոտ, այլ Հիսուս Քրիստոսն էր շրջում ժողովրդի մեջ՝ ուսուցանելով, բժշկելով և քարոզելով Աստծո արքայությունը: Ընդ որում, առանց հրավերի: Այս իմաստով, կաթողիկոսը պարտավոր էր գնալ ԱԺ:
Խնդիրն ունի մեկ այլ լուծում ևս: Ինչո՞ւ ընդդիմադիր պատգամավորները կաթողիկոսի օրհնությունը ստանալու համար չէին գնացել Վեհարան: Կարելի էր, չէ՞, ԱԺ բացման արարողության օրն ԱԺ-ի նիստերի դահլիճի փոխարեն Վեհարան գնալ և այդքան բաղձալի հովվապետական օրհնանքը ստանալ:
Ցավոք, կաթողիկոսն ու ընդդիմադիր պատգամավորները հերթական անգամ նախընտրեցին մնալ օրվա իշխանության կողմից թելադրված օրակարգում»: