Կիսապաշտպան Ջուդ Բելինգհեմը կարող էր հեռանալ Մադրիդի «Ռեալից» ամառային տրանսֆերային պատուհանի ընթացքում, սակայն ակումբը կտրականապես բացառել է նրա վաճառքի հնարավորությունը։ Աղբյուրի տվյալներով՝ անցած մրցաշրջանի ավարտին ֆուտբոլիստի հայրը՝ Մարկ Բելինգհեմը, բանակցություններ է անցկացրել «Ռեալի» ղեկավարության հետ՝ որդու հնարավոր հեռանալու վերաբերյալ։ Քննարկումների պատճառը եղել են մի շարք մարզական հարցերի շուրջ տարաձայնությունները։
Բելինգհեմը «Ռեալ» է տեղափոխվել 2023 թվականին՝ Դորտմունդի «Բորուսիայից» 127 միլիոն եվրոյի դիմաց։ Ֆուտբոլիստի գործող պայմանագիրը մինչև 2029 թվականի հունիսն է։ Մադրիդյան ակումբում հանդես գալու ընթացքում կիսապաշտպանը մասնակցել է բոլոր մրցաշարերի 140 հանդիպման՝ դառնալով 46 գոլի և 33 գոլային փոխանցման հեղինակ։