Ազգային ժողովի 9-րդ գումարման առաջին նիստին Ամենայն Հայոց Կաթողիկոս Գարեգին Երկրորդի մասնակցության հարցը շարունակում է մնալ քննարկման թեմա։
Լրագրողների հարցին՝ արդյոք Վեհափառը ներկա է լինելու ԱԺ առաջին նիստին, վարչապետ Նիկոլ Փաշինյանը նշել է․
«Ես Գարեգին Երկրորդի անունով կաթողիկոս չեմ ճանաչում»։
Միևնույն ժամանակ, մամուլում տեղեկություններ են շրջանառվում, որ առաջին նիստին հնարավոր է մասնակցի կարգալույծ քահանա Տեր Թադեն։
«Այդ օրը պարզ կլինի», – ասել է կարգալույծ քահանա, Թալինի տարածաշրջանի նախկին հոգևոր հովիվ Տեր Թադեն (Արամայիս Թախմազյանը)՝ անդրադառնալով ԱԺ առաջին նիստին իր մասնակցությանը։
Նա դուրս է եկել «Քաղաքացիական պայմանագիր» կուսակցության գրասենյակից, սակայն չի հայտնել, թե ինչ նպատակով էր այնտեղ եղել։
Հարցին՝ արդյոք ինքը ցանկանում է փոխարինել Կաթողիկոսին ԱԺ նիստում, Տեր Թադեն պատասխանել է․
«Կարող եք հարցն ուղղել ԱԺ-ին, համապատասխան գրասենյակ, այնտեղ ձեզ կպատասխանեն»։
Հիշեցնենք՝ ըստ մամուլի հրապարակումների՝ Վեհափառը հրավեր չի ստացել մասնակցելու ԱԺ 9-րդ գումարման առաջին նիստին։