Արցախի նախկին առաջնորդների և մյուսների գերիների գործով Բաքվի վերաքննիչ դատարանում շարունակվել են պետական մեղադրողների ելույթները, հայտնում են տեղական լրատվամիջոցները։
Նշվում է, որ «դատավարությանը» որպես դիտորդներ մասնակցում էին նաև Ադրբեջանի մարդու իրավունքների հանձնակատարի (օմբուդսմենի) գրասենյակի աշխատակիցները։
Ըստ մեղադրողների՝ իբր «հետազոտված ապացույցները հաստատում են», որ Գարիկ Մարտիրոսյանը, Դավիթ Ալավերդյանը, Լևոն Բալայանը, Վասիլի Բեգլարյանը, Գուրգեն Ստեփանյանը և Էրիկ Ղազարյանը մասնակցել են անօրինական գործողությունների։
Պետական մեղադրողը դատարանին խնդրել է մերժել վերաքննիչ բողոքները և ուժի մեջ թողնել Բաքվի ռազմական դատարանի մեղավորության դատավճիռը։
Կեղծ դատավարության դատական ճառերի փուլն ավարտվել է և, ըստ տեղական ԶԼՄ-ների, պաշտպանության կողմին տրվել է պատասխանելու իրավունք։ Նշվում է, որ Արցախի նախկին նախագահներ Բակո Սահակյանը և Արայիկ Հարությունյանը չեն ընդունել առաջադրված մեղադրանքները։
Հաջորդ նիստը նախատեսված է հուլիսի 31-ին։
Հայ գերիների վերաքննիչ բողոքների քննությունն սկսվել էր հունիսի 9-ին։
Պաշտոնական տվյալներով՝ Ադրբեջանում շարունակում է պահվել 19 հայ գերի։ Արցախի նախկին առաջնորդները 2025 թվականի դեկտեմբերին դատապարտվել էին 20 տարվա ազատազրկումից մինչև ցմահ ազատազրկման: Ադրբեջանի նախագահ Իլհամ Ալիևը բացառել էր նրանց վաղաժամ ազատ արձակման հնարավորությունը։
