Իրանը պահպանել է իր հրթիռային ուժերի մարտունակությունը և հարմարվել է նոր պայմաններին ԱՄՆ-ի հինգ ամսվա հարվածներից հետո, հաղորդում է Financial Times-ը՝ հղում անելով փորձագետներին։
Վերլուծաբանների կարծիքով, իրանցի ինժեներներին հաջողվել է արագ վերականգնել ստորգետնյա բազաները ռմբակոծություններից հետո։ ԿՀՎ-ի նախկին ռազմական վերլուծաբան Ջիմ Լամսոնը կարծում է, որ Հորդանանում ամերիկյան զորանոցների վրա վերջերս կատարված հարվածները, որոնց հետևանքով զոհվել են զինծառայողներ, ցույց են տալիս Իրանի կարողությունը թափանցելու ԱՄՆ-ի և արաբական հրթիռային պաշտպանական հմակարգեր։
«Նրանք հաջողությամբ բարելավել են իրենց միջին հեռահարության բալիստիկ հրթիռների թափանցման կարողությունը և դրանց ուղղորդման ճշգրտությունը։ Իրանը կատարում է ինչպես տեխնիկական, այնպես էլ մարտավարական ճշգրտումներ՝ հիմնվելով անցյալի հակամարտություններից ստացված փորձի վրա», – նշել է նա։
Վաշինգտոնի Մերձավոր Արևելքի քաղաքականության ինստիտուտի վերլուծաբան Ֆարզին Նադիմիի խոսքերով՝ «ավելի ու ավելի դժվար է դառնում պաշտպանվել բալիստիկ հրթիռներից դրանց թռիչքի վերջնական փուլում»։ Դրա համար ԱՄՆ-ն կարող է Իսրայելի աջակցության կարիք ունենալ, կարծում է փորձագետը։
ԱՄՆ-ի և Իսրայելի կողմից Իրանի վրա համատեղ հարված հասցնելուց կարճ ժամանակ անց այս տարվա փետրվարի վերջին ԱՄՆ պաշտպանության նախարար Փիթ Հեգսեթը հայտարարել է, որ գործողության նպատակներից մեկը «Իրանի հարձակողական հրթիռների և դրանց արտադրական հնարավորությունների ոչնչացումն է»։ Սակայն, թերթը հաղորդում է, որ հինգ ամիս անց, ԱՄՆ հարյուրավոր ավիահարվածներից հետո, Իրանը կարողացել է պահպանել իր հրթիռային ուժերի մարտունակությունը և շարունակում է ճշգրիտ հարվածներ հասցնել տարածաշրջանի թիրախներին, այդ թվում՝ Հորդանանին, Քուվեյթին, Բահրեյնին, Սաուդյան Արաբիային և Կատարին։