Լիբանանի նախագահ Ջոզեֆ Աունը զգուշացրել է, որ չի հանդուրժի Իսրայելի գործողությունները, որոնք խոչընդոտում են երկրի հարավային շրջաններում հարաբերությունների կարգավորմանը։
«Մենք հանձնառու ենք Վաշինգտոնում ստորագրված շրջանակային համաձայնագրի պայմանների կատարմանը: Այնուամենայնիվ, մենք չենք հանդուրժի Իսրայելի կողմից ձեռք բերված համաձայնությունների խախտումը»-ընդգծել է քաղաքական գործիչը։
Աունը նշել է, որ իսրայելական ուժերը շարունակում են հարվածել Լիբանանի տարածքին, այդ թվում՝ լիբանանյան բանակի վերահսկողության տակ անցած գոտիների մոտակայքում։
«Քաղաքային տարածքներում տների պայթեցումը և օկուպացված տարածքներում գյուղերի ավերումը Իսրայելի կողմից նախկինում Գազայում իրականացված կործանարար ծրագրի շարունակությունն է», – նշել է պետության ղեկավարը։
Նախագահական գրասենյակի տվյալներով՝ Աունը այս հայտարարությունն արել է ՄԱԿ-ի մարդու իրավունքների գերագույն հանձնակատար Վոլկեր Թուրքի հետ հանդիպման ժամանակ։ Նա կոչ է արել միջազգային հանրությանը վճռական գործողություններ ձեռնարկել՝ դադարեցնելու Իսրայելի կողմից հակամարտության կարգավորման գործընթացը խաթարող խախտումները։
Իր հերթին, Թուրքը նշել է, որ հետևում է Լիբանանում տեղի ունեցող զարգացումներին, մասնավորապես՝ Իսրայելի հարձակումներին՝ մարդու իրավունքների խախտումների վերաբերյալ մանրամասն զեկույց պատրաստելու նպատակով։
Հունիսի 26-ին Վաշինգտոնում ստորագրվեց շրջանակային համաձայնագիր, որի համաձայն Լիբանանի զինված ուժերը պետք է աստիճանաբար վերականգնեն երկրի ողջ տարածքի վրա վերահսկողությունը, իսկ Իսրայելը պետք է դուրս բերի իր զորքերը օկուպացված տարածքներից։