Այսուհետ կարող եք լիազորել այլ անձի՝ ձեր փոխարեն լրացնելու ձեր տարեկան եկամուտների հայտարարագիրը։ Լիազորված անձը ձեր անունից կկարողանա մուտք գործել համակարգ, ներկայացնել հայտարարագիր, ինչպես նաև իրականացնել այլ նախատեսված գործողություններ: Այս մասին Iravaban.net–ը տեղեկանում է ՊԵԿ-ից։
Օրինակ՝ լրացնել սոցիալական ծախսի փոխհատուցման դիմում և այլն։ Հենց այս նպատակով ֆիզիկական անձանց էլեկտրոնային ծառայությունների միասնական համակարգի վեբ տարբերակում գործարկվել է լիազորության գործառույթը։
Իսկ ինչպե՞ս լիազորել։ Կա երկու տարբերակ։
Առաջին տարբերակով հայտարարատուն պետք է մուտք գործի համակարգ և իր անձնական էջի «Իմ լիազորված անձը» ենթաբաժնում լրացնի լիազորվող անձի տվյալները։ Այնուհետև լիազորվող անձը նույն համակարգի՝ արդեն իր անձնական էջում, պետք է հաստատի կամ մերժի իրեն տրված լիազորությունը։ Հաստատելու դեպքում տվյալ անձը կստանա լիազորված անձի կարգավիճակ։
Ի դեպ, հայտարարատուն կարող է նշել նաև լիազորության գործողության ավարտի ամսաթիվը, որի լրանալուց հետո լիազորված անձը համակարգում այլևս չի կարողանա որևէ գործողություն իրականացնել։
Մեկ այլ տարբերակով լիազորված անձ գրանցելու համար հայտարարատուն կարող է դիմել ՊԵԿ հարկ վճարողների սպասարկման ցանկացած սրահ՝ ներկայացնելով դիմում և լիազորագիր՝ միաժամանակ կցելով իր անձնագրի և լիազորվող անձի նույնականացման քարտի պատճենները։
Կարևոր է իմանալ, որ այս դեպքում հայտարարատուն կարող է չունենալ էլեկտրոնային ստորագրություն, մինչդեռ լիազորված անձը պարտավոր է ունենալ էլեկտրոնային ստորագրություն, որպեսզի կարողանա ներկայացնել հայտարարատուի տարեկան հայտարարագիրը։
Ի դեպ, հայտարարատուն անհրաժեշտ փաստաթղթերը Պետական եկամուտների կոմիտե կարող է ներկայացնել նաև առցանց՝ e-request.am հարթակի միջոցով։ Օրինակ՝ եթե դուք հայտարարատու եք, սակայն գտնվում եք արտերկրում, ապա լիազորված անձի միջոցով, առանց դժվարության, կկարողանաք ներկայացնել ձեր հայտարարագիրը։